Mali-ah dan lova siam rangkachak laih chhuahna khur chimah mi 40 chuang an thi a, a tam zawk hi hmeichhia an ni tih a. He chhiatna hi Inrinnia thleng kha a ni.
Chhiatna thleng hi an ram khawthlang lam, rangkachak tamna, Kayes region-a Kéniéba khaw bulah a ni.
Thite hi industry atana thil lai chhuaktuten an kalsan khur inhawngah rangkachak bâng an zawng a, a bang velte chu an ker a, an hai nasa hle thin niin rangkachak lai chhuaktu pawl hruaituin Reuters a hrilh.
Tun hi chawlhkar thum lek chhunga Mali-a thil laih chhuahna khura chhiatna thleng pahnihna a ni a. January thla tawpah khan thil laih chhuahna khur chhunga tui lutah mi 10 vel an lo thi tawh.
Inrinnia thil thlenga thi zat hi sawi dan a inang lo nual bawk.
Tual chhung police chuan AFP news agency hnenah mi 48 an thih thu an sawi a, industry union hotu erawh chuan mi 43 niin Reuters hnenah a sawi thung.
“Thenkhat hi tuiah an tla a, thenkhat chu hmeichhia niin an fate nen an tla a ni,” tiin police chuan AFP an hrilh.
Chhanchhuah hna thawktuten ruangte zawngin an la chhuak hlawm.
Mali hi khawvela rangkachak lai chhuak tam ber pakhat a ni a. An laih chhuah dan hmang erawh en uluk loh a nih avangin chhiatna a thleng fo thin a, an laih dan hi a him lo chi niin mi thiamten an sawi.
Kum khat awrh liam taah pawh khan khur chimah mi 40 vel an lo thi tawh.
Dan lova laitu pawh an tam a, heng mite hi hmeichhia an ni deuh ber thin nghe nghe a. Dan anga rangkachak lai chhuaktuten an hluihlawn tawh khur retheihna avangin an lut a, an thuin an lai veleh mai thin a ni.
Mines ministry chuan chhiatna hi Kéniéba leh Dabia khaw inkara thleng a nih thu Reuters an hrilh tawh a, a bak erawh an la sawi lo va. Team tirin a hmunah en chiang dawn tih an tar lang.
Inrinnia chhiatna thlenna hi Chinese company-in an enkawl thin, an hluihlawn tawh niin AFP chuan a tar lang.
Beijing hi Mali-a thil laih chhuahnaah hian an inrawlh thuk hle a, sorkar phalna erawh a ni.
Mali hi leilung hausakna – rangkachak, thir, manganese, lithium leh uranium an ngah tih an hriat avangin Chinese investor tam takin an bawh a ni.
Ram dang mi an luh hian Mali pawh a tichangkang a, a bikin inkalpawhnaah an chhawr a, sorkarin China hnena leiba a neih tam phah thung a, a rulhna lam an ti thei dawn em tih hlauhthawnna pawh a awm mek bawk.
Chinese-ten thil an lai chhuak hi an rama khuarel thil awmten an tuar a, an tiriral nasa tia sawiseltu an tam bawk.
Mali hi an rama inbun zinga mining company lian ber pakhat, Canadian firm Barrick nen a hlawkna insem thu-ah an inmul lo mek bawk a. Thla hmasa khan Malian sorkar hian gold bar $ maktaduai 245 man chu Barrick atangin a man a, CEO Mark Bristow manna thupek a chhuah hial.
Bristow-a hian an inrem lohna chu chin fel ngei a ni dawn tih erawh kar hmasaa Bloomberg-in an kawmnaah a sawi thung.
Rangkachak khur chimah mi 40 chuang thi
