Mizoram sawrkarin ration buhfai a chhekkhawl tam laiin, retailer hnena pekchhuah tur erawh a awm rih lo. Tunhnaiah Aizawl Zuangtui kudam-ah buhfai pekchhuah tur an nei mumal loh thu a darh a. MNF Thalai leh Congress Thalai pawhin a hmunah an enfiah a. Zuangtui kudam-ah hian buhfai pekchhuah tur a awm mumal rih lo a, retailer engemawzat chuan December thla quota an la sem zo thei rih lo nia thu dawn a ni.
Hetih lai hian Food Civil Suuply & Consumer Affairs department chuan buhfai chhekkhawl hrim hrim hi chu a tam a. Harsatna eng eng emaw avangin Bairabi kudam atangin phurh chhuah mai theih a ni lo a, truck 40 vel chuan an thiar tan mek tih an sawi.
FCS&CA hotute sawi danin, kumin ruah tlak tam lai khan Assam Hailakandhi district-a Jamira-ah rel kawng a tih chhiat phah a. Thla thum – August, September leh October thleng rel a lut thei loa, FCI buhfai chawkluhna ber a nih avangin hemi hun chhung hian buhfai lakluh a awm lo. Rel kawng hi October thla tawpa siamthat a ni a, November-ah chuan dan pangngaiin phurh luh leh theih a ni tawh. Tunhnaiah Bairabi ah hian transformer chhiat avangin ni 6 chhung power supply a mumal lo a, online hmanga buhfai lut leh chhuak hi kalpui vek a nih tawh avangin a khaihlak tel phah a ni. Nimin, December 20 atang khan buhfai hi pekchhuah leh theih tan a ni a, truck awm mek ang angten Bairabi kudam atanga phurchhuakin, truck 40 vel chu phur thei mai an awm tih an sawi.
Congress Thalai chuan Zirtawpni khan Zuangtui kudam hi an tlawh a. Mizoram retailer hrang hrangah December thla ration buhfai a thena sem a, a thena sem loh a la nih chhan leh kudam-a buhfai semchhuah retailer-te lak tur a awm lo a ni tih an dawn vangin an finfiah a. Hlauthawng lo turin mipui an chah.
Congress Thalai president Laltawnliana chuan, sawrkar tihmualpho tum vang hrim hrima kal an ni lo a, mipuiin an hnena an manganna an thlen vanga kudam hi tlawh an ni tih a sawi a. Chutih rualin retailer tinah buhfai pek chhuah kim a nih thu a thawktuten an lo hrilh avangin thlaphang lo turin mipui a chah.
Retailer tam takin buhfai sem tur an neih har deuh avang leh a hun taka mipuiin an dawng lo chu sawrkar pawhin opposition beng thlen kher hmaa hma la tur leh an inzawrh ang ngeia mipui tan tun aia nasa leh, sawrkar kal tawhte aia thil ti theia mipuia inzuar an ni tih inhre thar turin a ngen tih a sawi bawk.
“Ration buhfai hi retailer-te hnenah DCSO thuchhuahin allotment order hmanga challan an tihfel hnuah delivery order (DO) hmangin kudama lak thin a ni a. Order a ruala an hmuh vek laia buhfai semchhuah tur sawrkar kudam-a a awm lo titih fo hi sawrkar inthlahdah vang a ni,” Laltawnliana hian a ti.
Ration buhfai a awm a, sem tur erawh awm rih lo
