Raw-thing tam tan mekah financial assistance ngen

Raw-thing tam tan mekah financial assistance ngen
Agriculture minister PC Vanlalruata chuan Mizorama raw-thing tam mekah loneituten harsatna an tawh pawha a sutkianna ngaihtuah pui tur leh, a bik taka sum lama puihna an dawn theih dan ngaihtuah lawk sak turin centre a ngen.
Indian Council of Agricultural Research (ICAR) Society chuan Thawhtanni khan New Delhi-ah annual general meeting vawi 96-na an hmang a. Mizoram atangin Agriculture & Farmers Welfare minister PC Vanlalruata a tel.
Union minister for Agriculture & Farmers Welfare Shivraj Singh Chouhan chuan a kaihruai a. State/UT-a agriculture leh a kaihhnawih minister, department officer, agriculture lama mithiamte leh loneitu pawl leh pawl hrang hrang aiawh an tel a ni.
ICAR hmalakna leh hmasawnna thlirho a ni a. State hrang hrang atanga member-ten agricultural research chungchanga an state atanga rawtna leh beiseina an thlen bawk.
Mizoram minister pawhin thu a thlen a. Mizoram sik leh sa leh a ram leilung nena inmil tlang rama chin tur buh chi tha (high yielding upland paddy) siam chhuah dan ngaihtuah turin; Mizoramin thlai chi tha zawk kan neih theihnan ICAR-in hma lakpui turin; National Mission on Oilseeds – Tree-borne Oilseeds hnuaiah 2024- 2025 sawrkar kuma Mizoram sawrkarin Tung (vernicia fordii) chin a tharthawh leh tah thu a sawi a. Tung chungchangah ICAR-in research neihsak tur leh a chingtuten tam zawk leh quality tha zawk an thar theih nan package of practices duansak turin a ngen.
Mizorama raw-thing (bambusa tulda) tam mek avanga loneitute leh mipui harsatnate sukiang tura ICAR-in thiamna hmanga pui tur leh sawrkar laipuiin special financial assistance ruahmansak turin a ngen a ni.
Lunglei, Champhai leh Saitual district-a Krishi Vigyan Kendra (KVK) din thuai a nih theihnana hma la turin; agriculture-a thalaite hip tura ruahmanna tha zawk siamsak tur leh hemi atan hian ICAR-in skill development leh agri-entrepreneurship programme duanpui a, technology leh innovation hub din pui leh, start-up incubation support pe a, thalaite tana sustainable farming model, tunlai dinhmun nena inmil siamsak turin a ngen bawk.
Union minister for Agriculture & FW hnenah College of Horticulture tihchangtlunna atan mamawh leh Mamit district-a wet rice cultivation (WRC) nasa zawka kalpui a nih theihnan hma laksak turin a ngen a ni.