Rural Development department hnuaia scheme hrang hrang, district leh block level-a officer-ten an kalpui dan chu Thawhlehni khan Aizawlah thlirlet a ni a. RD minister Prof. Lalnilawma’n a hmanpui.
RD department chu mipui dawr tam ber department leh hmuh theiha an hnathawh lansarh berna department a ni tih minister hian a sawi a. Officer-te chu fimkhur taka hna thawk turin a chah. Department hnuaia hnathawh thlirleta thutkhawm thin chu department tana a pawimawh hle tih sawiin, thlen chin atanga hma sawn zel tur chuan kan thlen chin hriatchian chu tihmakmawh a ni tih a sawi.
Officer-te chu sawrkar kutke ber an ni tih hrethiam a, inveng renga rinawm leh dik taka hna thawk tura chahin, sawrkar kalpui mek ‘Project Rotling’ tihhlawhtlin kawngah theihtawp chhuahpui zel turin a sawm bawk.
Thutkhawmah hian RD department hnuaia scheme hrang hrang kalpui dan bihchian a ni a. State Cell MGNREGA kaltlanga District leh Block hrang hrang dinhmun sawi a ni. Directorate of RD atangin BADP, PMKSY-WDC 2.0, SAGY leh SASCI kalpui dan thlirlet a ni a. MzSRLM kaltlanga SRLM leh DDU-GKY kalpui dan pawh sawi niin, project director leh BDO thenkhat hnen atangin Social Audit Unit, MISSAAT, SIRD&PR sawifiah a ni.
RD-in department hnathawh thlirlet
