Real chakpuitu Modric
Tualchhung lama game thum chhung chak lawm tur nei tawh lo Real Madrid chuan Pathianni zan La Liga match pakhatah sihnih faiin an mikhual tang thei ve tak Girona lakah hnehna lawm tur an nei leh thei ta hram a, an goal hmasa zawk hi Luka Modric-a thawh a ni.
Estadio Santiago Bernabeu chhunga mipui 74,028 tlim hmur tuihal so bulh bulh tana in tur chhawpsak ngei tum Real hmatawngte’n first half chhungin goal an nei hman lo dawn emaw tih hman thuak hnu minute 41-ah Croat Modric hian long-range volley pui tak hmangin goal thun harsat avanga hlauthawng hman defending champion tana thawk huaina tham tling goal pawimawh a sualchhuak.
Modric hian a ball hmuh chu a awma dawngin,pen 25 vel zet atangin Girona goalkeeper Paulo Gazzaniga dan zawh loh half-volley pui zet a hlap lut.
Modric hian Real Madrid TV-ah a goal thun chungchang sawiin, “Keima goal liau liau a ni. Ball ka thunun a, tha zetin ka hlap phei a, goal-ah a lut ta kha a ni a; ka goal thun tawha la fuah berte zinga rinluh tel chi a ni em ka hre chiah lo nain Bernabeu-a goal khung hi chu a special ve hrim hrim thin.
“Kan tan hnehna pawimawh a ni a, title race-ah kan cham zui zel tur a ni,” tiin a naute a fuih nghal.
Kum 2012-a Real Madrid-in Tottenham Hotspur atanga an leichhuah Modric-a goal ropui kan hmuh hma hian Manchester United midfielder hlui Donny van de Beek chuan Arnaut Danjuma tauhpial atangin Real keeper Thibaut Courtois thiamzia lantirna hun tha a siamchhuak a, a goal tur ni thei chu Courtois hian a kut pakhat zawkin engtin tin emaw a dansak hman hram a ni.
Real goal hnihna pawha khat leh dalh a, minute 83-ah Brazilian international Vinicius Junior chuan Kylian Mbappe kawng sialsak atangin a thun a; ti hian, season kal lai inelna hrang hrang match 39 a khelh tawh atangin kum 24 mi hian Real tan goal 24 a thun tling ta a; tun bik kha nikum November thla hnu lama a league goal hmasaber a ni.
Osasuna game-a red card hmu England midfielder Jude Bellingham chuan mipui zing atangin a thiante inkhel hi a thlir.
Real faithful chak lawm belhchhah turin khup hliam pawi chi anterior cruciate ligament (ACL) injury an tih avanga kumkhat chuang bawksawp tawh defender David Alaba chuan khelmual a lut ve leh thei ta thung a; Pathianni zan game kha ni 434 hnua Austrian a inkhelh leh vawikhatna a ni.
Nilaini zanah European champion hian San Sebastian lamah Copa del Rey semi-final match khelin mualneitu Real Sociedad an luhkhung zui leh dawn a ni.
Pathianni hnehna kha thla hmasa daih tawha Real Valladolid an hneh hnua Bernabeu club-in La Liga hnehna an chan leh vawikhatna chiah a ni!
Real hian Champions League knockout phase playoff lamah 6-3 aggregate-a Manchester City hnehin last 16 an lut fel tawh a, La Liga lamah pawh game 25 atanga point 54 hum chungin table-ah hmahruaitu Barcelona chu point an nihrual a; Inrinni away game-a sihnih faia Las Palmas hnehtu Barca hi head-to-head tehnaa an san zawk avangin Real chuan pathnihna an luah chhunzawm ta tho a ni.
Pathumnaah point 53 hum chungin Atletico Madrid an thu a, anni pawh hian Inrinni liamta khan sithum faiin mualneitu Valencia an sawp ve bawk.
Real chakpuitu Modric
