Real Madrid manager Carlo Ancelotti chuan a tumhnihna atana a vawn leh mek Bernabeu club atanga chhuah tumna a neih loh thu leh club thuneitute lamin a hna ngai chelh chhunzawm tura an hriattir tawh thu a sawi.
Italian coach hlawhtlingberte zinga mi hi Brazil manager ni tura sawirik a awm a, mahse, amah chuan Spanish club-a a contract neih lai hman zawh a duh thu leh club lam pawhin chhuak lo tura an duh thu tunhnaiah sawichhuakin, “Mi zawng zawngin ka dinhmun an hre vek a, 2024 season tawp thlenga he hmuna contract nei lai ka ni a, la cham zui zel rih hi ka duhdan chu a ni,” a ti.
La Liga title an kawl lai a hum-himpui zo ta si lo a, manager thlak ching dawklak Spanish giants hian an petchhuah mai rinna a lian leh hman a, tunhnaia media a hma-chhawn tum pawhin chuti lam hawi thu chu an zawt ngei a, Real lamin cham rih turin an tiam ngei em tih zawhna chu ‘yes’ tiin a chhang.
Ancelotti hian kum 2013 – 2015 chhung khan a vawikhatna atan Bernabeu club hi kum hnih chhung a lo enkawl tawh a, Champions League a lakpui hnuah chhuahsan zui leh maiin, a kual fe hnuah June 2021 khan Everton chhuahsanin, a tumhnihna atan Real-ah bawk a kirleh a ni.
Season liamta khan a team enkawl lai kuta European Cup 14 luh tlinna lakpuiin, a ho bawk hian Spanish league title an chang a, mahse, kumin erawh a pahnihah hian an hlawh-chham ve ve a; Champions League semi-final pakhat zawkah Man-chester City hneh loin an tlawm a; khelh li la nei chunga La Liga cham-pion ni fel tawh Barcelona lakah point 14-in an hnufual bawk.
Ancelotti hian Real Madrid chu Uefa Super Cup, Fifa Club World Cup leh Copa del Rey-ah a champion-pui fel tawh bawk.
Pathianni zana Valencia an hmachhawn hma press conference-ah Italian coach hian season tha zawk an beisei laiin tha ve thoah an chhuak tih a sawi a, La Liga lamah an duhkhawp hmu zo ta lo mah se competition dang pathumah an champion ta tho tih a tarlang tel.
Real chhuahsan tum lo Ancelotti
![](https://theaizawlpost.org/wp-content/uploads/2023/05/real.jpg)