Pathianni khan Spain ram pawn daih Riyadh khawpuiah Spanish Super Cup final khelhin Spanish club ropui pahnih Barcelona leh Real Madrid an inhmachhawn a, Catalan team zawkin 3-1 hnehna nen champion an lawm.
Saudi Arabia rama an khelmual chhuanvawr King Fahd Inter-national Stadium-a Barca chakna goal thumte kha Gavi, Robert Lewandowski leh Pedri thawh-khawm niin, Pathianni zan in-khelah Nou Camp club-in kawng tinreng leh kiltinah inkhel an thunun a, an goal thum hlawhchhuahte erawh Bernabeu club player-te tihsual hrinchhuah a ni thung.
Manager Xavi Hernandez chuan he game-ah hian a formation thulkhung 4-3-3 system hmang ta loin midfield-ah player pali a dah a, tlarhma lamah Lewandowski a maltlattir a, centre back Ronald Araujo chu right back lamah chhawrin, hei hi Real winger tuanrang Vinicius Jr. tithuanawp tura a tactic a ni.
Brazilian Vinicius hi hun pum tih theih deuh thawin a reh ta hmak reng a, veilam sira tan a khawhtir Gavi pawhin kalphung thar a hlawkpui a, goal hmahruai a thun bakah assist vawihnih a siam-chhuak ta nghe nghe.
Barcelona goal khatna hi Real defender Antonio Ruediger tihsual hrinchhuah niin, Barca veteran player Sergio Busquets lakah ball a chhuah a, ani hian box chhunga a team-mate awmchhun Gavi tan chhawpsakin, minute 33-ah he player la naupang tak hian a ke veilam hmangin Nou Campd team hmahruaina goal a chhuihlut.
Bayern Munich atang tawha goal thun thulh thei lo Lewandowski chuan minute 12 a liam leh rualin Barcelona goal hnihna a thawh ve leh a; he goal-ah pawh hian Realdefender dang Dani Carvajal talbuaiin, a position hloh hlawkpuiin Gavi chuan veilam sirah ball a thunun theih phah a, Frenkie de Jong buaipui tura hlanchhawnin, Dutch-man hian through ball pui tak siamchhuakin, Polish striker chuan goal ruakah a thun theih phah.
First half chhung zawnga goal zawna vawikhat pawh ball thawn-lut zo lo Real Madrid hi second half-ah pawh talbuai chhunzawm zelin, chiang lehzuala tlawm pumpelh tumin goal ven hna an thawk a ni ber e!
Heti chung hian Barcelona goal thumna chhuah turin an player-te an la chesual zui leh ta tho a; substitute Dani Ceballos chuan midfied-ah ball hlohin, Gavi rawn dawkchhuak zawk chuan Pedri tan a siamsak leh a, goal ruaka lut lai kan hmu leh.
Hun pekbelhah hun khirhkhana Real Madrid damna thlentu ni thang Karim Benzema chuan zangna-dawmna goal tilut ve bawk mah se a team tlawm tur a chhan zo lo. France forward ball thawnluh hi Barca keeper Marc-Andre ter Stegen chuan dansak zet mah se rebound atanga Benzema ball chhuih nawn chu a dang zo ta bik lo a ni.
Inkhelh banah Barcelona captain Sergio Busquets chuan an inkhel boruak Movistar Plus hnenah sawichhuakin, “Midfield kan thuamchak a, Araujo khan Vinicius rawn pawngchhuak tur a dangchat hneh hle a, anni lam kha duhthlan tur kan siamsak lo a, nuamsain hnehna kan chang a; he hnehna hian title dang kan beisei zui zel turin team min tichak khawp ang,” a ti.