Real in Alonso an ban

Khawvela football club hausa leh hlawhtling ber Real Madrid chuan an manager Xabi Alonso an ban a. Alonso hmunruak luah lailawktu atan Liverpool defender hlui Alvaro Arbeloa an ruat zui nghal.
Real Madrid hi Pathianni zan khan Spanish Super Cup final ah an tlawm a, an hmelma lian FC Barcelona an hneh lo. Real Madrid hneha champion nawn leh Barcelona player ten Real Madrid player te medal dawng tur chu zahna lantirin Guard of Honour an pe. Real Madrid manager Xabi Alonso hian a player te chu champion Barcelona zahna lantir a, Guard of Honour pe let ve turin a duh niin sawi a ni a. Mah se, Kylian Mbappe chuan a player puite chu Barcelona hi Guard of Honour pe lova, khelmual chhuahsan vat vat turin a ti ve thung. Hemi tuma Mbappe chet dan hian sawi zui a hlawh viau nghe nghe tiin tarlan a ni. Mbappe chet dan hian manager Alonso nen an inkar a that loh zia leh manager a zah lohzia a tilang a ngaih a ni.
Final-ah an tlawm vangin Alonso leh Mbappe te hi an inhnial zui chiam niin tar lan a ni a. Alonso tactic chu Mbappe hian a sawisel na hle niin an tarlang hlawm. An hmelma lian ber Barcelona lakah an tlawm vangin Real Madrid thuneitute pawh an lawm lo hle a. Alonso hi Real Madrid president Florentino Perez nen an inhmuthiam lo via niin tarlan a ni tel bawk. Barcelona laka an tlawm hnu lawkah Alonso hian manager hna a kalsan a, inbiak remnain an inthathen niin tarlan a ni.
Inbiak remnaa inthen nia tarlan ni bawak mah se, Aloso hi chuan cham chhunzawm a a duh a, Real Madrid hian loh theih lohin an nawrchhuak lui zawk nia sawi a awm. Alonso chhuah hnu lawkah an manager lailawk tur an tichiang nghal thei mai hian thil a lo intan thui tawh viau tih a nemghet.
Real Madrid midfielder hlui Xabi Alonso hian kum 2022 atangin German Bundesliga club Bayer Levekusen a enawl a, a chetthatpui hle. Leverkusen hi tui let hnu lama a vawi khat nan Bundesliga-ah a champion pui a, Bayern Munich rorelna a titawp. Bundesliga-a a champion pui bakah hian DFB-Pokal leh DFL-Supercup-ah a champion pui a, Europa League final a hruai thleng bawk. Leverkusen a chetthatpui em vang hian Globe Soccer Best Coach of the Year: 2024, VDV Bundesliga Coach of the Season: 2023–24 leh Football Manager of the Year in Germany 2024 chawimawina a dawng hial a, a hming a chher lian hle.
Germany-ah a hming a chher len hnuin club ropui leh hausa zawk Real Madrid in an manager atan an awt a, kum 2025 khan Carlos Ancelotti hmunruak luahtu atan an la lut. Real Madrid a zawm tirhin che chhe lem lo mah se beisei a phak lo tulh tulh a, Santiago Bernabeu-ah thla riat a cham tling meuh chuan an petchhuak ta hial a ni.
Alonso hi Real Madrid player thenkhatte nen an inkar a tha lo viau a, a tactic chu a player thenkhat ten duh lovin, an sawisel nasa viau thin niin tarlan a ni. Alonso hian Real Madrid hi game 34 a kaihruai hman a, vawi 24 hnehna a chanpui hman. Thla liam ta khan Celta Vigo an hneh loh vangin an mahni tantuten an auel hial a. Heta tan hian Alonso hma lam hun a chian lo thar leh zual. September thla khan Atletico Madrid lakah 5-2 ngawtin an tlawm a, hei hi Atletico Madrid laka an tlawm chian ber tum a ni hial nghe nghe a ni. La Liga lamah pahnihna ni mekin an chunga awm Barcelona nen point liin an inthlau mek. La Liga-a an chetthat tawk loh bakah champion league lamah Liverpool leh Manchester City te an hneh lo ve ve bawk. Barcelona hnuaia an len zui tak zel vangin Real Madrid hian an manager Alonso hi an ban ta nge nge a ni ber mai.
Xabi Alonso zah lo leh a tactic sawisel nasa ber pawla sawi Kylian Mbappe chuan an hnen atanga chhuak ta Alonso a ui thu a sawi ve luam lawi. Alonso hnuaiah thil tam tak a zir thute, a duh aia a cham rei loh thute leh inrintawkna petu a nih thute sawiin Mbappe hian Alonso chu a hma lam hun atan duhsakna a hlan thu social media-ah a tarlang. Alonso hi EPL club ten an ngaihven zui nghal viau a, EPL lamah a hmel kan hmu thuai a nih pawhin a mak lo ang.
Tarlan tawh angin Real Madrid chuan Alonso hmunruak luahtu atan Liverpool defender hlui Alvaro Arbeloa an ruat zui nghal. Real Madrid tan La Liga-ah vawi 153 zet lo khel tawh Arbeloa hian Real Madrid B team a enkawl mek a. Alonso hmun ruak a luah lailawk rih ang.