Real-in Barca nena an inkar pawtzim leh nghal
Inrinni zanah Spanish La Liga hmahruaitu Barcelona chuan si thum faia an mikhual Mallorca sawp chungin table-a an hmahruaina an pawtsei hlek a, mahse, Pathianni zanah pahnihna luahtu Real Madrid-in si hnih faiin mualneitu Valencia an hneh ve leh a, Catalan-ho nena an inthlauhna chu point khatah bawk an dahkir leh nghal.
Estadio de Mestalla khelmuala mipui 47,515 pungkhawm hmaah Spanish giants lamin first half chhungin goal an khung zo lo a, goal venhim tum ran chunga Valencia game inthlungkhawm tha lutuk kha an sutlang zo ngang lo a ni ber!
Second half tir lam minute 65-ah Alvaro Carreras chuan mikhual tlarhnung vengtu pahnih paltlangin Dean Huijsen-a ball pek chu goal-ah a chantir ta tho a, he goal khat hmang hian mikhual team-in hnehna an chang dawn nia a lan hnu hun pekbelh minute khatna a kal mek laiin French forward Kylian Mbappe chuan season kal laia Real tana a goal 38-na a tilut ve leh a, a zawna La Liga game sarih zet chak tling ta Bernabeu club-in an chung chiaha thu Barcelona an kalsan hla duh lo!
Mbappe goal kha Brahim Diaz-a chhawpsak atanga a thun niin, season kal lai La Liga bika a goal 23 thunna chiah a ni.
Alvaro Arbeloa team khan hrem tawk Vinicius Junior bakah inhliam Jude Bellingham an chhawr thei lo chungin a tir lamah ball an thunun nghet nghal hmiah a, mahse, Valencia goal-a ding Stole Dimitrievski tan erawh harsatna an siam nghal thei mai bik lo.
England defender Trent Alexander-Arnold chu malpui na avanga thla hnih ngawt a chawlh hnuin khelmualah a kirleh thei ta a; he right-back hian Madrid a zawm hnuah inelna hrang hrang match 16 chiah la khel tlingin, tah chuan assist vawi hnih a nei ve tawh.
English midfielder Bellingham kha a hma chiah La Liga match-a 2-1-a Rayo Vallecano an hneh tuma intina niin, khelmual chhungah minute 10 chauh a khawsa hman tihin kaihza tha na avangin mittui nen khelmual a chhuahsan a, thla khat vel chawl tura ngaih niin, March international break nang hmana a kir hman an beisei.
England manager Thomas Tuchel chuan May thla hian World Cup squad a puang tawh tura ngaih a ni a, March ni 27-a Uruguay an infiampui tur leh March thla vek ni 31 friendly-a Uruguay an hmachhawn tur hi squad khawrpumna tura player fiahna inkhel hnuhnung a nih tawh a rinawm.
England hian kumin World Cup bul an tanna inkhelah June ni 7 khian Croatia an hmachhawn dawn a ni.
Team talbuai Valencia khan table-ah 17-na la luah hram hram bawk mah se bottom three an luh thlak lohna chu point khat chauhin a dal tawh a, relegation zone-a tang mek team pathumte aiin match khatin an la khel tam zawk bawk!
Real-in Barca nena an inkar pawtzim leh nghal
