Inrinni zan khan Spanish La Liga khelh chhunzawm a ni a, champion lai Real Madrid chuan Kylian Mbappe goal hnih thun hmangin hnehna an chang. Villareal lehthaltu Real Madrid hian La Liga table chung ber an luah thar.
Champion lai Real Madrid hi Villareal hmachhawn turin Estadio de la Cerámica-ah an lenglut. An len luhna mualah bul an tan tha lo viau a, goal an chhuah hma hle. Mualneitu Villareal tan hian Juan Foyth chuan inkhel tan atanga minute 7-na lekah hmahruaina goal a thun. Hma takah goal an thun vangin Villareal an phur viau a, team lian lakah point hmuh ngei tumin tan an khawh zui nasa viau naa lehthalin an awm thuai thung.
Kar laihawla inkhel hautak tak hmachhawn hlimhlawl ni mah se Real Madrid in chak ngei tumin thapui an thawh. Si phur zawk an nih hnuin ana huaisenzia an lantir a, an khel tha zui hle nghe nghe. Real tan hian Kylian Mbappe chuan minute 17-naah goal thunin an si phurh a sut. Goal khat ve ve an thun hnuin inkhel a hmuhnawm zui viau a, goal pawh a luh belh leh thuai. An si phurh sutna goal thuntu Mbappe chuan minute 23-na lekah hma an hruai letna goal a thun zui leh nghal zat. Minute ruk chhung leka Mbappe goal hnih thun hmangin Los Blancos hian Villareal an hneh a, point thum hlu tak an hmu.
La Liga champion lai Real Madrid hian khelh 28 atanga point 60 hmuin table chung ber an luah mek. Real Madrid hian hmahruai mek mah se an hnuai chiaha awm FC Barcelona aiin khelh hnihin an khel tam zawk mek thung. Pathianni zan khan Real Madrid elpui lian Barcelona leh Atletico Madrid te an inhmachhawn a, he result hian table a sawi danglam thei dawn thung.
Villareal laka Real Madrid chakpuitu Mbappe hian La Liga-a a season hmasa berah goal 20 a thun tling der tawh a, top-scorer ni mek Robert Lewandoski a phak lohna chu goal khat chiah a ni tawh. A club tharah beisei angin vul nghal chuk lo mah se Mbappe thiamzia a langchiang telh telh a, tunah zet chuan april par vul vanglai ang maiin Mbappe hi a vulin a vul chuk tawh a ni.
Real Madrid hian nilai zan khan champions league-ah inkhel hautak tak an hmachhawn a, minute 120 zet an khelh hnuin Atletico Madrid chu penalty shoot-out ah an hneh thei hram. Nilai zanah chau hnepa an khelh hnuin inrinni zanah La Liga an hmachhawn zui leh nghal zat. Inkhel an hmachhawn zawn hian manager Carlos Ancelotti a tilungawi lo hle. An dilna pawmsak ni lo pawh ni engang mah se a karah darkar 72 a tlazep hman a nih loh chuan inkhel an hmachhawn tawh ngai loh tur thu Ancelotti hian a sawi. Kum 2023 a fifa in rawtna a siam dan chuan inkhel an hmachawn hnuhnung ber atanga darkar 72 tal a tlazep hman a nih loh chuan match neih zawn loh a ni naa he rawtna hi La Liga in an hmang rih lo thung. Ancelotti hian La Liga thuneitute hnenah Villareal nen an inkhelh hun sawn hla turin an dil thu a sawi a. An dilna hnawl a nih zel vangin a lawm lo tak zet a ni.
Real in Villareal an lehthal
