Real leh Barca chak ve ve

Real leh Barca chak ve ve
Spanish La Liga title race-a a sang pahnih luahtute Pathianni zanah an chesual duh lo ve ve a, Madrid derby-a Real Madrid chak zanah hmahruaitu Barcelona pawh tawlhtlu duh bik loin an mikhual Rayo Vallecano lakah point thum an hlawhchhuak a, table-a a sanbg pahnih hi point li bawkin an inthlau chhunzawm.
Real Madrid 3-2
Atletico Madrid
Santiago Bernabeu khelmualah mikhual inthlahrung lo Atletico lamin goal an thun hmasa a, first half minute 33-a Ademola Lookman-a goal kha chawlhlawk hmain mualneitu team lamin an sut hman lo.
Tuihnai fahrana kha goal hmahruai siamchhuaktu Giuliano Simeone kha an manager Diego fapa a ni nghe nghe.
Second half tir lam minute 52-ah Vinicius Junior chuan David Hancko laka Brahim Diaz-a hlawhchhuah penalty atanga Real siphurh sutna goal chhuihlutin, tun kha La Liga bika Atletico Madrid laka Vinicius goal tihluh vawi khatna a ni!
He goal an thah atanga tuibur hmuam da awm velah Federico Valverde chuan mikhual tlarhnung luahtute tihsual hlawkpuiin home team hmahruailetna goal a khung a; minute 66-ah Nahuel Molina chuan hla derh dawrh atanga goal pui tak khungin Atletico siphurh a sut ve leh.
2-2 a nih atanga minute 10 a kal leh tihah hisdtory thui tak a neihpui Alex Baena laka a foul avangin Valverde chu straight red card hmanga hnawhchhuah a ni.
A tlem zawk an nih hnuah Brazilian Vinicius chuan he match-a a goal hnihna leh Real chakna goal ni zui ta chu mikhual goalkeeper Juan Musso dan hman lohin a thun leh a, Catalan team nena an inthlauhna chu point liah a dahlet leh.
Pathianni zan inkhel hmasa lamah hmahruaitu Barcelona chuan Rayo Vallecano hnehin anmahni hnaihbertu Real Madrid nena an inkar chu point sarihah an kham sang hman a, Bernabeu club hian point thum hmuh belh chungin Barca kal fal lutuk tur an veng zui leh thei hram a ni.
Substitute Trent Alexander-Arnold pass atanga a goal tihluh leh nen a vun rawng avanga diriam hlawh thei tak Vinicius hian a match hnuhnung vawi 11-ah goal 10 a thun tling ta a ni.
England squad thara hmun chang pha lo Alexander-Arnold hian minute 64-a Real captain Dani Carvajal thlaka khelmual a luh hnuah a khel tha hle a, title race chep sawt tawh taka tlawm a rem loh em emna inkhelah chakna goal a siamchhuak.
England friendly match pahniha Japan leh Uruguay infiampui tur Thomas Tuchel-a squad thara lang pha bik Jude Bellingham pawhin Pathianni zan derby-ah a chipui Arnold ang bawkin substitute bench atangin chawlhlawk hnuah khelmual a lut a, chawn tha na avanga match 10 zet a chawlh hnuah harsatna lian tawk loin a inkhel ve leh thei ta a ni.
Tun kha Spanish top flight bika Real-in September 2022 hnu lama an thenawmte an hneh leh vawi khatna chiah a ni.
League table-a palina luah pha chauh Atletico hian semi-final match-a Barcelona hnawtchhuakin, thla thar Copa del Rey final-ah Real Sociedad an hmachhawn dawn a; Barca nen Champions League quarter-final match-ah an insu zui leh bawk ang.
Barcelona 1-0
Rayo Vallecano
Spotify Camp Nou la sak zawh fel hmul fai loha mipui 56,812 chauh punkhawmna inkhelah mualneitu team hian first half minute 24-na leka an captain Ronald Araujo goal khat thun hmangin an hmahruaina an sawhnghet a; Joao Cancelo corner chhuih atanga a goal tauhluh kha season kal laia Araujo La Liga goal thumna chiah a ni.
Barca hian tan atanga minute khat a liam hmain goal an chhuah teuh ther ther hle a, pen ruk vel lek atanga Carlos Martin-a goal tur chu an goalkeeper Joan Garcia chuan engtin tin emaw a dansak hlauh a ni!
First half game nung lem lo takah khan mikhual Rayo lamin target fuha shot tum khat chauh an nei!
Barca tan Raphinha chuan goal thun theihna hun remchaqng hmu m,ah se Rayo goalkeeper Augusto Batalla a paltlang zo bik lo.
Second half lamah Catalan team goal-veng Garcia chuan pui takin hnai set sawt atanga Unai Lopez-a tauhluh tur a dansak a, Rayo siphurh sutna hun tha a tlawlh.
Minute sarih chauh awm tawhah Pacha Espino chuan kual ngawka chhuihin Barca bar chungah a thlawkchhuak leh hlauh a, Nou Camp club an him hram a ni!
Hansi Flick-a team Barceloan hian international break zawh April ni 4, Inrinni khian Atletico khelmualah Champions League quarter-final match an khel dawn a nih kha.