World Cup 2026-ah champion tura rinkai zinga mi Spain chuan an ram aiawh tur mi 26 awma squad an puangchhuak ta a, a vawi khat nan Real Madrid player ten Spain squad-ah hmun an chang lo.
Manager Luis de la Fuente chuan Spain aiawh tur hian hliam vanga chawl mek Lamime Yamal a ko tel. Kum 18 mi Yamal hian April ni 22-a Barcelona tan a khelh tumin hliam a nei a, mittui nei khelmual a chhuahsan. World Cup a khelh theih loh mai a hlauhawm hman viau laiin koh tel a ni. Yamal rual hian hliamin hun rei tak a tihbuai Nico Williams leh Arsenal midfielder Mikel Merino te koh tel an ni bawk. Merino hi Arsenal a inlan theih loh reng hnuin EPL 2025=26 a an match hnuhnung berah a inlan thei tawh a. Hei vang hian ram aiawh turin koh tel a ni.
Hliam vanga chawl reng player pathum koh an nih lai hian Real Madrid defender pahnih Dean Huijsen leh Dani Carvajal te koh tel an ni lo thung. Luis de la Fuente hian World Cup a Spain aiawh turin Real Mdrid player koh a nei lo hrim hrim a. Inelna lianah Spain aiawh tura Real Madrid player an tel loh vek vawi khatna a ni hial nghe nghe.
Real Madrid player thlang tel lotu De la Fuente chuan, “Club khat chauh emaw, club dang emaw en bik ka nei lo. Lai lo taka tan bik nei angin tualchhung ram bial khat ngawt ka ngaihtuah ve lova, khawvel huap a nih thuah ka chiang bur. Spain ai an awh phak vangin ka player te hi inchhuang hle mai se, chu chu ka duh ber a ni,” tiin Real Madrid player a koh loh chungchangah inthliarna a neih loh thu a sawi.
Spain squad-ah Real Madrid player ten hmun an chan phak loh laiin an hmelma lian FC Barcelona player pariat ngawt Spain aiawha World Cup khel turin koh an ni thung. Barcelona academy La Masia hi khawvela football academy tha bera ngaih a ni a. La Masia chhuak player pariat ngawtin Spain tan World Cup an khel dawn ta bawk. Real Madrid academy La Frabica pawh hi khawvela academy tha zual palina a ni phak. Academy an neih that em vangin Spain ball thiam hi a ril bik a ngaih a ni.
An club a ropui a, an hlawhtlin em vangin ‘Real Madrid player an tel lo’ tih hi a ri a ring viau. Season liam taa Real Madrid chet dan ngaihtuah erawh chuan mak lutuk a ni hran lo. Real Madrid hian trophy lak nei lovin season an khar. A bikin Real Madrid a Spain player te langsar fal leh chetha vut an awm lem lo. Defender pahnih Dean Huijsen leh Dani Carvajal te hi koh theih awm hnaivai an ni a. An elpuite chet dan ngaihtuhin koh an ni lo a nih pawhin thil mak ta lua erawh a ni hran chuang lo thung.
Spain hi Europe khawmual champion lai an ni a, Fifa World Cup-ah hian kum 2010 khan an lo champion tawh bawk. Football academy nei tha, khawvel football club hausa leh hlawhtling ber Real Madrid neitu an nih bakah, Barcelona pawh khawvela football club ropui ber zingah an tel reng bawk. Hengte a nih vang hian player an nei tha em em reng a. USA, Canada leh Mexico ten an thlen tur World Cup 2026 ah pawh hian champion tura rinkai ber zinga mi an ni.
Arsenal si nghak Dadvid Raya chuan English Premier League-ah a zawnin Golden Glove vawi thum ngawt a dawn a. Spain manager Luis de la Fuente chuan Spain-ah chuan Unai Simon a tha ber a, David Raya an hriat loh thu a sawi. Hei hian tunlaia si nghak tha ber pawla ngaih Raya tan Spain-ah bul tan a beiseiawm lohzia a tilang chiang hle. Raya hi club tan a chetthat em vangin Unai Simon tan pawh tan leh zual hle a ngaih phah ngei ang.
Champion tura rinkai zinga mi Spain hi Group H-ah; hmel thar Cape Verde, Saudi Arabia leh Uruguay te nen an awm tlang a June ni 15-ah Cape Verde hmachhawnin bul an tan ang.
Spain World Cup squad
Goalkeepers: Unai Simon (Athletic Bilbao), David Raya (Arsenal), Joan Garcia (Barcelona).
Defenders: Marcos Llorente (Atletico Madrid), Marc Pubill (Atletico Madrid), Pedro Porro (Tottenham), Aymeric Laporte (Athletic Bilbao), Eric Garcia (Barcelona), Pau Cubarsi (Barcelona), Marc Cucurella (Chelsea), Alejandro Grimaldo (Bayer Leverkusen).
Midfielders: Rodri (Manchester City), Martin Zubimendi (Arsenal), Mikel Merino (Arsenal), Pedri (Barcelona), Gavi (Barcelona), Fabian Ruiz (Paris St-Germain), Alex Baena (Atletico Madrid).
Forwards: Yeremy Pino (Crystal Palace), Victor Munoz (Osasuna), Mikel Oyarzabal (Real Sociedad), Ferran Torres (Barcelona), Lamine Yamal (Barcelona), Dani Olmo (Barcelona), Nico Williams (Athletic Bilbao), Borja Iglesias (Celta Vigo)
Real Madrid player tel ve lohna: Spain squad chu
