Inrinni Champions League final-a sihnih faia Borussia Dortmund hnehtu Real Madrid squad chuan Pathianni khan Madrid khawpui thlawklutin, an club chanchina European Cup title 15-na an hawn chu bus chungkhuh nei lo hmangin khawlai an fanpui a, an team lo chhawntu kawtthlera mipui sang tam tak phungkhawm chuan kum 10 hnua an club atanga kalbo ve tawh tur Toni Kroos-a hming an lamri nasa hle.
Madrid khawpui lunlai Cibeles Fountain an tih hmunah Spanish fans an pungkhawm nasa zual a, UCL Trophy parade lo chhawntu mipuite chuan ‘Toni, Toni’ tiin an midfielder chhuak tur an thlahliam.
Reuters palaiin kawngkama lo ding Real Madrid supporter pakhat an kawm Diego de la Cruz an tih chuan, “Madrid hi maw, i thah loh vek chuan a that ang che,” a ti!
Inrinni tlai atang tawh khan Madrid khawpui hmun tinah kawr var ha an inlar sup sup tawh a, London khelmuala tawpna hamrik a rik rual khan Madrid khawpui lamah chuan mipui sang chuangin kut ni vangthlaa an chhuahkhawmna lungdawh Cibeles fountain an pankhawm nghal sung sung a, he hmun hi hma khawsang atang tawha player-te leh fans lamin champion no mawi an lawmho thinnna hmun a ni.
Zan khaw tarek thlenga supporter sang rualin he hmuna champion lawmna party an kalpui hnu Pathianni zing vartianah an team nghah chuan Madrid an lut a, an ram sanaa tlai lam dar 6 atangin team-ho nen party tour an tan zui leh ta a ni.
Real Madrid s quad ram chhuak hlawhtling kirleh hi Almudena Cathedral-ah lo hmuah niin, Madrid regional government chuan duat takin a lo dawngsawng bawk.
Trophy lawmnaa thusawitu club president Florentino Perez chuan Euro 2024 zawh ruala football chawlhsan ve tawh tur an midfielder Toni Kroos chungah lawmthu sawiin, khelmual chhung leh pawn lam thlenga club tana a engkim hlantu a nih thu a tarlang tel.
Germany international Kroos pawhin phur leh thatho tak chungin kha kum 10 chhung theihnghilh theih tawh loh tura a hun tawnah lawmthu a sawi a, central Sol square an tihah chuan mipuiin ‘Toni Toni’ an lo tirual dual dual.
Cibeles fountain leh a chhehvelah hian venghimtu police lam pawh hmuh tur an thahnem hle a; Real captain Nacho chuan an club scarf hmangin chu hmuna Phrygian goddess Cybele lim chu a tuam a; Santiago Bernabeu Stadium hmuna light show hmangin chak lawm party khar niin he hunah hian kum 38 mi lai ni ve tawh midfielder Luka Modric chuan a chhuah loh tur nemnghetin, “Season tharah kan inhmu leh dawn nia,” tiin mipui a vailiam.
Real Madrid trophy parade-ah kalbo tur ‘Toni’ hming a ri ring
