Real Madrid veltu an electrician hlui!

Real Madrid veltu an electrician hlui!
Nilaini zan Copa del Rey round of 16 match-ah nikum finalist Real Madrid an tlawm a, 3-2-a Spanish second division club Albacete chakna goal pawimawh pahnih hi footballer a nih loh laia Bernabeu stadium-a electrician hna thawk tawh Jefte Betancor-a tihluh a ni!
Albacete khelmualah team pahnih hi si hnih ve ve thunin an inhnehtawk reng a; hun pekbelhah Greek club lian Olympiacos-in Albacete lama loan-a an tirhchhuah mek Jefte hian he inkhela a goal hnihna leh 3-2-a Real tlawmna goal ni nghal a thawh leh a, Bernabeu-a electric chhia siam pah khan Real training lai a lo en thla ru thin a ni ngei ang!
Player insawnkual nasa ve tak a nih avanga journeyman striker an tih mai Jefte Betancor hi tunah kum 32 mi ni tawhin, Nilaini zan Carlos Belmonte Stadium-ah khan bench atangin second half-ah khelkmual a lut ve chauh a; a luh laiin team pahnih hi 1-1-in an inhnehtawk mek a, minute 81-ah 2-1-a Albacete hmahruaina goal khungin, Real-in an siphurh an sut hnu hun pekbelhah second division club chakna goal hlu bik a thawh zui leh ta a ni.
Real Madrid manager thar Alvaro Arbeloa chu a debut-ah club tenau zawk hneh loin a mualpho nghal a, engtia rei tak inruai ang maw?!
A career-a teikual tam ve tak Jefte hi kum 1993 khan Las Palmas de Gran Canaria khuaah piangin, Hercules club-ah bul a tan a; a hun tam zawk chu Spanish league hniam zawk club hrang hrangah a khel kual a, a vawn tawh club zingah Tenerife B, Eldense leh UD San Fernando tihte an tel.
An ram lama club lianin an hnar zel hnuah Jefte hian ram pawn a pan a, tah pawh chuan Austria third division club Stadl-Paura a zawm a; Romania leh Greece ramah a career a chhunzawm.
Greece club Olympiacos chuan loan-in Spain ramah an thawnlet a, thlaruk chhung football a chawlhsan laia electrician-a ruaitu Real Madrid barakhaihtu a ni ta mai hi tunkar football bika mite tuipui pakhat a tling!
Spanish giants laka goal hnih a thun hnuah Jefte chuan, “Football chawlhsanin hna dang ka thawk a, chuti chungin ka thenawmah training ka chhunzawm reng tho a; ka rilru ka siam a, ka chhungte leh psychologist puihnain football-ah ka kirleh a, vawiin hian ka beih ram hramna Iawmman ka hmu ta niin ka inngai a, kum kaw kalta khan tun ang hun hi ka nghakchhuak ang tih ka suangtuah pha lo,” a ti.
A goal hnih thun hmanga Albacete supporter rual sapataltirtu Jefte hian a club vawn mek tana a ‘contribution’ chungchang tarlang chhunzawmin, kha zan boruak kha ‘magic’ ang mai niin a sawi a:
“He team hian minute 95 chhungin tawnhriat ropui tak kan chharchhuak a, kha kum tam tak chhunga ka talbuainate ngaihtuahlet chungin inkhelh bana ka nupui leh fapain min rawn ko kha ka football career-a hun hlu ber a ni a, ka tap lo thei lo,” a ti.
Goal hnih a thun hnua Albacete lamin 3-2-a hma an hruai tawh hnu, hun tlemte la awmah khan Jefte hian a thla a la muan loh thu leh rilru a la hahdam loh thu tarlang telin, “Real Madrid kha hamrik hnuhnung ber rik hma zawnga beidawng ve ngai lo club an nih miau avangin hun tawp dawna hma hruaitu zawk nih mai kha thlamuanna chi a ni lo,” tiin an boruak tawn a sawi chhuak.
Chak an lawm laiin Jefte hi an team doctor-in a hnarah a khak fuh palh a, a hnar a thi rei fu a, chu mi chungchang chu fiamthuin a sawichhuak a, “Min enkawl kha a ba reng a ni,” tiin.
Albacete hnehna kha Copa del Rey history-a rin loh zawk chak (upset) lian berte zinga pakhat niin, Real Madrid electrician hlui thiltih khan sawichhuah a hlawh ve fo tawh dawn niin a lang.