Real tan Bellingham vul chhunzawm
Spain leilunga a season khatnaah a club thar Real Madrid chu La Liga champion a nihpui hlimhlawt a, Thawhlehni zanah pawh goal khat thawh lehin a team chu Deportivo Alaves lakah 5-0 hnehna a chanpui a, English player zinga Spanish top flight season khat chhunga goal khung hnember record kawltu Gary Lineker-a goal 20 thun tluk turin goal khat chiah a mamawh tawh.
Kum 1986/87 season-ah khan Lineker chuan Barcelona tan goal 20 tilut tlingin, kha record kha a ding rei ta hle a, season kal laia league game hnih khelh tur a la neihah Bellingham hian a chipui khumin record thar siam thei tak ang maw?
England international Jude Bellingham hian Santiago Bernabeu inkhel minute 10 an khel tling tihah Toni Kroos siamsak atangin mualneitu team hmahruaina goal a khung a, season kal laia a league goal 19-na chiah niin, season tawp ruala golden boot dawng tur intlansiakna vawrtawp hnai tawh takah goal khatin Girona striker Artem Dovbyk a la pha lo.
Darkar chanve khelh tlin hma lawkin Vinícius Junior chuan goal khatin a belhchhah a; chawlhlawk dawn hun pekbelhah Federico Valverde chuan thun ve lehin, half time-ah Real-in sithum faiin hma an hruai hman.
Bernabeu inkhel kha title an lak fel hnua Real Madrid game khat khelhna chiah niin, Bernabeu first half chhunga goal thum an ruh hmanah khan an lung a la awi lo nasa mai a, second half-ah goal hnih dang thun belhin, mualneitu team goal hnih dang hi Vinicius Jr leh Turkish rawlthar Arda Guler-te tihluh a ni.
Andriy Lunin luahlana a hum ngai luahkir Belgian keeper Thibaut Courtois cuan a tir atanga lutin goal a veng a, vawi duai lo ‘save’ ropui lantirin, heti a nih leh tak siah chuan Real boss Carlo Ancelotti hian Champions League final-a Borussia Dortmund an tum hunah tu zawk nge a khelhtir dawn tih chu thutlukna siam harsa tak a ni chho dawn ta niin a lang!
Real hian 1989-89 season daih tawha tlawm nei loa La Liga game 31 an khelh tlin record tluk turin game khat chiah an mamawh tawh.
Real tan Bellingham vul chhunzawm
