Real tana danglamna thlentu Endrick

Real tana danglamna thlentu Endrick
Ningani zan Copa del Rey last 16 inkhel hun pangngaiah mualneitu Real Madrid chuan tlarhma lama an mihrang pahnih Kylian Mbappe leh Vinicius Junior-te goal chakpui zo loin extra time an khelh buai a ngai a, tah chuan Brazilian rawlthar Endrick a lo lang a, goal hnih khungin, Federico Valverde goal khat thawh nen 5-2-a an mikhual Celta Vigo hnehin Carlo Ancelotti team-in quarter-final an lut hram.
Pathianni Spanish Super Cup final-ah 5-2-in Barcelona an hneh lo a, hnehna chanlet leh vat mamawh Spanish giants hian an kawtkaiah nuamsa pangngaia Celta hneh thei tur awm takin hun pangngai tawp hma minute sarih vel chauh awm tawh thlengin an hmahruaina chu 2-0 a la ni.
Home team goal hmahruai hi first half tawp hnaih dawn minute 37-a France captain Mbappe thun niin, he foal khat hmang hian home team-in sikhat faia hma hruai chungin chawlhlawk an hmang phawt.
Second half tir lam minute 48-ah Vinicius chuan sihnih faia mualneitu team hmahruaina goal thawh ve lehin, Real hi harsatna lian tawk zui loa chak chhunzawm mai tura ngaih an ni hman a, mahse, minute 83-ah Jonathan Bamba chuan mikhual siphurh pakhat zawk sut thenin, hun pekbelh minute khatna a kal mek laiin Chelsea defender hlui Marcos Alonso chuan a hlawhchhuah penalty atangin Claudio Giraldez team siphurh sut zawhna goal a chhuihlut a, Celta Vigo tan last-16 pelh beiseina a nung thar leh rih!
Minute 30 hun pekbelhah bench atanga khelmual lut Brazilian rawlthar kum 18 mi Endrick chuan a ze pui a chhuah zui ta a, Santiago Bernabeu-ah goal hnih khungin, a goal hnih inkarah hian Valverde a rawn tlazep ve bawk.
Inkhelh banah Endrick chu Real Madrid TV hmaah a inhrosa khar khar a, “Hei hi Real Madrid a nih hi aw, a tawp thlengin kan fight thin a nia. Kan zuai mai ngai lo a, kan fight tang tang thin ngai e.
“Tun kha inkhel hautak zet chu a ni ngei mai a, mahse, a pawimawh zawk chu kan mamawh tawk goal kan khung a, kan chak zui bawk lai kha a ni.
“Extra time a nih tawh kha chuan kan tlan tam a ngai tih kan hre vek a, goal thum chhe lo zet zet kan khung a, ka tan chuan ka goal thun pahnih kha an pawimawh hle a; khati ang game khelh kha ka nuam tih zawng tak niin, stadium chhunga fans an tam pauh leh nuam ka ti sauh thin,” a ti.
Kumin bika Santiago Bernabeu-a an inkhelh vawikhatnaah Real Madrid khelmual lut kha Spanish Super Cup final-a an hmelma lian ber Barcelona laka tlawm hlim an nih avangin an ti dui a, chutah home fans thinrimin an la ‘boo’ khum ruih ruih zui a!
Real Madrid manager Carlo Ancelotti chuan an club fans ngei atanga ‘boo’ khum an hlawh chu a hriatthiam thu leh an mi leh sate thinrimnain khelmual chhunga a naute a tibuai lo lai chu a lawmna a nih thu a tarlang tel.
Italian coach chuan, “Min han boo rawn luih luih kha kei chuan thlir dan dang daihin ka lo thlir a, fans atanga team leh coach tana benharhna dar ri (wake-up call) angin ka ngaithla.
“Barcelona laka kan game ngaihtuahin kan mite thinrimna kha a hriatthiam theih a, a hnu lamah team lamin tha takin an chhanglet a, fans lam min nawrna kha kan sawtpui a ni,” tiin inkhelh ban press conference-ah ‘boo’ khum hlawh a dawnsawn dan a sawichhuak.
Ningani zan Copa del Rey round of 16 inkhel dangah Spanish Cup holders Athletic Bilbao chu Osasuna lakah 3-2-in an tlawm ringawt!
Mikhual Osasuna tan hian Aimar Oroz chuan goal hmahruai khungin, a hnuah Ante Budimir chuan goal hnihin a belhchhah a; Nico Williams leh Oscar de Marcos-te’n Ernesto Valverde team siphurh pahnih sut then ve bawk mah se he goal hnih chauh hian Bilbao tlawm tur a chhan zo ta chuang lo!
Season liamta semi-finalists Real Sociedad chu last eight lut zingah tel thungin, an mikhual Rayo Vallecano lakah 3-1 hnehna an chang.
Quarter-final draw hi January ni 20, Thawhtanni atana dah niin, draw-a tel turte chu – Real Madrid, Barcelona, Atletico Madrid, Valencia, Leganes, Getafe, Osasuna leh Real Sociedad-te an ni.