Real title beiseina tlahniam takzet ta!

Real title beiseina tlahniam takzet ta!
Inrinni zanah Real Madrid chuan 2-3-in an mikhual Villarreal an hneh lo leh ta ringawt a, Spanish La Liga table-ah pahnihna la luah chhunzawm bawk mah se game khata khel tlem zawk chungin an chung chiaha hmahruaitu Barcelona lakah he thu buatsaih lai thleng hian point 12 zetin an hniam tawh a, league game vawi 10 chiah khelh tur awm tawhah an title kawl lai humhim turin beiseina a chau zual zel a, trophy hum tur chuan an chak chhoh par par a ngaih tawh piahlamah Catalan team an chetsual viau a ngai tawh ang!
Santiago Bernabeu inkhelah Real hi goal-ah chefuh hmasain, minute 16-ah Villarreal player Pau Torres chuan an lam goal-ah a tilut palh a, mahse, minute 40 khelh tlin hma chiahin Samuel Chukwueze chuan Lo Celso siamsak atangin Yellow Submarine siphurh a sut a, half time-ah 1-1-in team pahnih an inhnehtawk phawt.
Second half tir lam minute 48-ah Vinicius Junior chuan Ceballos thawhrah atangin Spanish giants hmahruaina goal khung ve leh bawk mah se minute 70-ah Jose Luis Morales chuan Villarreal siphurh a sut ve leh a; hun pangngai tawp hma minute 10 la awmah goal khat nei tawh Chukwueze chuan Baena Rodriguez-a siamsak atangin Madrid club tlawmna goal ni zui ta a thawh ve leh tlat a, La Liga game an khelh hnuhnung vawithumah tum hnih ngawt Real Madrid an tlawm tling ta a, hmahruaitu Barcelona nena an inkar a hlat duai tawh avangin La Liga title beiseina bo tluka ngaih a ni tawh!
Inrinni zan inkhelah khan mualneitu team tlawm hreh tan khawhin hun tawp hnaih lamah an siphurh sut theihna hun remchang hmu hman vuaiin, box chhunga tlu paha handball nia lang Aissa Mandi vangin referee Javier Alberola Rojas chuan Real Madrid chhuih turin penalty a ham hman zet a, mahse, VAR review nghah a nih hnuah penalty hi sut a ni a, table-ah Villarreal-in pangana luah chhoh phahin, season thara Champions League khelh phakna hmun top four dailut turin point li chiahin a dan gta.
Barcelona-in Thawhtannia an mikhual Girona laka point thum an hmuh leh theih chuan Bernabeu club nena an inkar hi point 15-ah an dah thei dawn a, Real tan Nou Camp club kut atanga league title chhuh chu a khirh zual tawh khawp ang le!