Record siamin Beyonce ‘Cowboy Carter’ a No.1

Record siamin Beyonce ‘Cowboy Carter’ a No.1
Beyonce album thar ‘Cowboy Carter’ chu Billboard 200 (albums) chart-ah a No.1 a, he chart-a No.1 kai thei album pariat a neihna a ni. ‘Cowboy Carter’ hi Top Country Albums-ah a No.1 bawk a, he chart-a mihang hmeichhe zaithiam No.1 kai thei hmasa ber a ni.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah album-a hla mal hralhna atanga album tlukpui leh streaming atanga album tlukpui te belhkhawm thin a ni.
Beyonce ‘Cowboy Carter’ hi kar khat chhungin US-a 4,07,000 hralh theiin No.1-ah a debut a, kumina album tlangzarh zingah kar khat chhunga hralh tam ber a la ni. Album an hralh 4,07,000 atanga 2,32,000 chu streaming atanga album hralhna tlukpui (on-demand official stream maktaduai 300,41) niin, album tak tak hralh chu 1,68,000 a ni a, album-a hla mal hralhna atangin 7,000 a tling thei bawk. Beyonce album-ah chuan kar khat chunga stream nasat ber a la ni a, country album zingah kar khat chhunga stream nasat lamah palina a ni bawk.
Beyonce hian he chart-a No.1 kai thei album pariat a nei tling ta, hmeichhe zaithiam zingah he chart-a No.1 kai thei album ngah lamah palina niin, Taylor Swift (13), Barbra Streisand (11) leh Madonna (9) te chiah a pha lo.
Cowboy Carter album-ah hian hla 19 awmin, Beyonce hian zaithiam lar hrang hrang a thawhpui nual a, guest artist-ah hian Miley Cyrus, Willie Jones, Tiera Kennedy, Linda Martell, Willie Nelson, Dolly Parton, Post Malone, Reyna Roberts, Shaboozey, lehd Brittney Spencer te hming a lang a, a fanu Rumi Carter a lang tel bawk. Anni bakah hian 070 Shake, Jon Batiste, Ryan Beatty, Gary Clark Jr., The-Dream, Rhiannon Giddens, Paul McCartney, Pharrell, Robert Randolph, Nile Rodgers, Raphael Saadiq, Sara Watkins leh Stevie Wonder te hming pawh a lang.
Future leh Metro Boomin album intawm ‘We Don’t Trust You’ cji 1,31,000 hralh lehin No.1 atangin No.2-ah a tawlh a, chart No.1 hlui Morgan Wallen ‘One Thing at a Time’ chu 69,000 hralh lehin No.4 atangin No.3-ah a insawn thar leh a, chart No.1 hlui bawk Ariana Grande ‘Eternal Sunshine’ chu 58,000 hralh lehin No.3 atangin No.4-ah a tawlh ve thung.
J-Hope ‘Hope On the Street, Vol.1’ chu 50,000 hralhin No.5-ah a debut a, BTS member J-Hope album he chart a top 10 kai thei pahnihna a ni a, nikum September khan a album dang ‘Jack In the Box’ chu No.6 a lo kaipui taw bawk a ni.
Olivia Rodrigo album, chart No.1 pawh kai tawh ‘Guts’ chu 49,000 hralh lehin No.2 atangin No.6-ah a tawlh a, Noah Kahan ‘Stick Season’ chu 44,000 hralh lehin No.5 atangin No.7-ah a tawlh a, chart No.1 hlui Taylor Swift ‘Lover’ chu 40,000 hralh lehin No.7 atangin No.8-ah a tawlh a, chart No.1 hlui tho SZA ‘SOS’ chu 39,000 hralh lehin No.6 atangin No.9-ah a tawlh a, chart No.1 hlui bawk Zach Bryan self-titled album ‘Zach Bryan’ chu 39,000 tling lo deuh hralh lehin No.8 atangin No.10-ah a tawlh ta bawk.