Record siamin Mariah Carey ‘All I Want for Christmas Is You’ a No.1

Record siamin Mariah Carey ‘All I Want for Christmas Is You’ a No.1
Mariah Carey Krismas lengzem hla chuai thei lo ‘All I Want for Christmas Is You’ chu Billboard Hot 100 (US singles) chart-ah a No.1 a, he chart-ah ian a zawn lovin kar 19 a No.1 tling ta a, he chart-a No.1 ni ngun ber record siamtu Shaboozey “A Bar Song (Tipsy)” leh Lil Nas X ‘Old Town Road’ featuring Billy Ray Cyrus te a nih rual ta chiah a, hetihrual hian ‘All I Want for Christmas Is You’ hi 2019 atang khan kum tin he chart-ah hian No.1 a la kai ta ziah a, kum sarih chhung kum tin a zawnin No.1 a ni thei a, hetiang ti thei hla dang a la awm ngai lo a, Krismas hla zingah he chart-a No.1 ni ngun ber a ni bawk.
‘All I Want for Christmas Is You’ hi Mariah Carey hla Hot 100 chart-a No.1 kai thei 19-na niin, soloist zingah he chart-a No.1 kai thei hla ngah ber a ni a, he chart-a a hla hrang hrang No.1 ni tawh te No.1 hun chhung belhkhawm pawh kar 98 a tling tawh a, he chart-a No.1 ni ngun ber record a siam pawh a sawhnghet leh zel a, amah hnaih bertu chu Rihanna (60) a ni. Carey hian 1990s, 2000s, ‘10s leh ‘20s-ah te Hot 100 chart-a No.1 kai thei hla a la nei vek bawk a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Mariah Carey ‘All I Want for Christmas Is You’ hian kar khat chungin stream maktaduai33.7, radio airplay ngaithlatu maktaduai 22.4 leh sales 3,000 neiin, Hot 100 chart No.1 a kai leh ta a ni.
December thla kan chuangkai a, khawvel huap pawhin Krismas hlaa lar leh ta a, tun kar chart top 10-ah pawh Krismas lam hla pasarih a lang a, chung zingah chuan Wham! Krismas lengzem hla “Last Christmas” chu No.6 atangin No.2-ah a invawrh a, he hla hi 1984-a an tlangzarh niin, tun hi he chart-a a tawnsan ber a la ni.
Wham! ‘Last Christmas’ hian stream maktaduai 33.2, radio airplay ngaithlatu maktaduai18.2 leh sales 2,000 neiin, No.2 a kai a, kum 2016-a chatuan ram panta Wham! member George Michael leh Andrew Ridgeley te hian an hla hi an tihchhuah atanga kum 40 hnuah he hlain he chart-a a tawnsan ber tum an thleng ta a, June 1985-a an hla ‘Everything She Wants’ No.2 a kai hnua he chart-a an thlen san ber a la ni bawk.
1958 classic Brenda Lee “Rockin’ Around the Christmas Tree”-in stream maktaduai 30.8, radio airplay maktaduai 20.5 leh sales 2,000 neiin, No.7 atangin No.3-ah a insawn a, 1957 classic Bobby Helms “Jingle Bell Rock”-in stream maktaduai 30.5, radio airplay maktaduai 20 leh sales 1,000 neiin No.8 atangin No.4-ah a insawn ve leh ta bawk.
Chart No.1 hlui KPop Demon Hunters soundtrack HUNTRIX “Golden” chu No.2 atangin No.5-ah a tawlh a, Taylor Swift “The Fate of Ophelia” chu No.1 atangin No.6-ah a tawlh a, chart No.1 hlui Alex Warren “Ordinary” chu No.3 atangin No.7-ah a tawlh ta bawk.
2014-a Ariana Grande hla ‘Santa Tell Me’-in stream maktaduai 24.8, radio airplay maktaduai 7.7 neiin, No.13 atangin No.8 a kai a, 1946-a tlangzarh tawh, Nat “King” Cole “The Christmas Song (Merry Christmas to You)”-in stream maktaduai 22.6 leh radio airplay maktaduai 16.5 neiin, No.18 atangin No.9 a kai a, 1963-a tlangzarh Andy Williams “It’s the Most Wonderful Time of the Year”-in stream maktaduai 20.7 leh radio airplay maktaduai 18.7 neiin, No.17 atangin No.10 a kai ve leh ta bawk.