Record thar nen Arsenal an chak

Inrinni zan khan English Premier League 2025-26 khelh chhunzawm a ni a, Arsenal chuan Burnley lakah hnehna changin an hmahruaina an sawh nghet. Arsenal rual hian Chelsea in hnehna an chang a. Manchester United erawh chu mikhual an nihna hmunah an chak lo zo thung.
Gunners an bon
EPL hmahruaitu Arsenal hi table hnuai lama awm Brunley hmachhawn turin Turf Moor-ah an leng lut. Mikhual an nihna hmunah bul an tan tha viau a, goal an thun thuai. Inkhel tan atanga minute 14-na lekah corner atanga ball kal Burnly in an clear that theih loh chu Viktor Gyökeres chuan hnaite atangin a tauh goal a, hmahruaina goal a thun. Arsenal in goal thun tura an lak luh Gyokeres hian September thla hnu lamah a vawi khat nan EPL-ah goal a thun ve leh ta a, a club thar Arsenal tan EPL-ah goal li a thun tling ta chiah.
Goal an thun hnuin Arsenal an khel tha chhunzawm a, an hlauhawm thei hle. Mawi takin an khingpuite an nawr tlang a, goal thun theihna hun tha nei zawn bawk mah se an hun tha neih an chhawr tangkai thei lova, an hun tha neih an hloh zawn. Uiawm takin goal thun lo zawn mah se Gunners an hawihai rei lova laipui a puak leh ta nge nge. Leandro Trossard cross tha tak chu Declan Rice chuan minute 35-naah fuh takin a tauh goal a, an goal hnihna a thun.
Chawlhlawk hnu lamah inkhel a hmuh-nawm zui viau a, Burnley in an si phurh sut tumin an mikhualte an nawr na hle. Hlauhawm siam thin bawk mah se goal an thun thei lova, goal post an pet per dawp bawk. Inkhel hmuhnawm takah goal a luh belh thei tawh lova, Arsenal in 2-0 a hnehna changin point thum an hmuh belh.
Arsenal hian khelh 10 atanga point 25 hmuin an hmahruaina an tizau a, an hnuai chiaha awm mek AFC Bournemouth nen point 7 in an inthlau mek. Bournmouth hian Pathianni zana an khingpui Manchester City lakah point an hlawhchhuah a nih chuan Arsenal nen an inkar hi a zim leh hret thung ang.
Arsenal hi season kal mekah an che bon chho viau a, a bikin ball kangah an hlauhawm thei hle. EPL season kal mekah khelh 10 an khel tawh a, khelh 10 an khel tawhah hian corner atangin goal 8 ngawt a thun tawh. Hei hi EPL-ah khelh 10-ah coner atanga goal thun tam ber niin EPL record thar a ni. Gunners hian EPL season kal mekah Mimual-ah vawi nga khelin corner atangin goal an thun vek nghe nghe a ni.
Chelsea an chak
Inrinni zana inkhel ngaihven hlawh; London derby-ah Chelsea chuan an elpui lian Tottenham Hotspurs an hneh a, point thum hlu tak an hmu.
Tottenham Stadium-a lenglut Chelsea tan hian João Pedro chuan minute 34-naah hmahruaina goal a thun. Pedro goal thun hi hun tawp thlengin an venghim a, Tottenham laka point thum hlu tak hmuh nan an hman. He point thum hlu tak vang hian Blues in Spurs point hmuh zat poin 17 an hmu tling ve chiah a, panganaah an inhlangkai. Tottenham lakah chakin, an point hmuh zat intluk bawk mah se Chelsea hi a hniam zawkah an tang zui thung a, Tottenham hian palina an luah mek.
Chelsea hian tunhnaiah London-a n elpu lian Tottenham an ngam viau a, an intawn hnuhnung vawi sarihah vawi ruk ngawt hnehna an chang a, vawi khat chiah tlawm zawkah an tang. Spurs lakah point thum an hmu deuh reng a ni ber.
United an chak zo lo
London club lian pahnih; Arsenal leh Chelsea an chak laiin Manchester United erawh chu Nottingham Forrest lakah an chak zo lova, an chak tluang lai a tawp.
Tunhnaia khel tha United hian City Ground-ah bul an tan tha a, goal thun hmasa zawkah an tang. United tan hian Casemiro chuan minute 34-naah hmahruaina goal a thun a, he goal hmang hian 1-0 a hmahruai chungin chawlhlawk an hmang.
Chawlhlawk hnu lamah mualneitu Nottingham Forrest an khel tha a, goal an thun thuai. Second half tan atanga minute thumna lekah Morgan Gibbs-White chuan mawi taka tauh goal in an si phurh a sut. An si phurh an sut atanga minute hnih hnu lekah Nicolò Savona chuan hma an hruai letna goal a thun zui leh zat a, United lakah 2-1 in hma an hruai let.
United in an si phurh sut tumin thapui an thawh a, an hlauhawm thei viau. An hun tha neih an chhawr tangkai theih loh reng hnuin Amad chuan minute 81-naah goal thunin an si phurh a sut a, tlawm an pumpelh thei hram.