Record thar nena chak Atletico

Thawhtanni zanah 7-0 tehrenga mualneitu Rayo Vallecano sawpin Atletico Madrid chuan La Liga away match-a an chak chian ber hun an tawngbua.
Vallecano hi season thara an league game hmasa pahnihah an chak a, Diego Simone-a team an mikhualna game-ah pawh hian heti tlawk tlawka bet tura beisei an nih chiah bik lo a, mahse, minute hnihna atangin si an chhuah tan a, half time a nih meuh chuan sithum an chhuah tling hman!
Mikhual goal hma-hruai hi Antoine Griez-mann-a tihluh niin, minute 16-ah Memphis Depay chuan a khung belh a; minute 36-ah Nahuel Molina chuan sithum faia Atletico hmahruaina goal a thawh ve leh.
Second half minute 13 chhungin Madrid atanga fehchhuak team hian goal li tehreng an thun belh a; Alvaro Morata chuan goal hnih thawhin, Angel Correa leh Marcos Llorente-te’n goal khat ve ve an thawh ve bawk.
He match-a an point thum hlawhchhuah leh nen khelh thumah Atle-tico hian point sarih neiin pahnihna an luah a, hmahruaitu Real Madrid lakah point hnihin an hniam.
Inkhelh banah France forward Griezmann chuan tan phat atangin game ropui an khel nghal tih a sawi a, team work tha tak nena point thum an hlawhchhuah avangin a hlim takzet tih a sawi.
He match-a Atletico Madrid tana chanchin tha lo awmchhun chu first half laia Dutch forward Depay inhliam kha a ni.
Tun kha kum zabi 21-na chhunga Atletico-in La Liga match pakhata goal sarih an tihluh tumhnihna niin, kum 2013 khan 7-0 bawkin Getafe an lo sawp tawh a ni.