‘Red Bull Aizawl Tlang Ruam’
intihsiak vawihnihna nei dawn
Kumin kumtawpa Red Bull-in Aizawl-a mountain bike intlansiak (urban downhill race) an buatsaih leh tur ngaihtuahin Thawhlehni khan Sports & Youth Services leh Tourism minister Lalnghinglova Hmar hoin a kaihhnawih sawrkar department hotute leh race neihna in a paltlang tur khawtlang hruaitute an thukhawm.
Thutkhawmah hian Tlang Ruam event kaihhnawih sawrkar department hotute bakah intlansiak neihna hmun tur – Upper Republic, Republic, Republic Vengthlang leh ITI Veng Local Council aiawh, Mizoram Cycling Association leh Red Bull India aiawh an tel a ni.
Khawpui chhunga mountain bike intlansiak, ‘Red Bull Aizawl Tlang Ruam’ hi 2024 October 26 khan a vawikhatna atan hlawhtling taka buatsaih a lo ni tawh a. Asia khawmualpuia Red Bull buatsaih urban downhill mountain bike intlansiak hmasa ber a ni. Nikum khan mi 22 intihsiakin, cycling khawvela mi langsar pahnih – Tomas Slavik (Czech Republic) leh Pedro Burns (Chile) chu mentor niin an tel bawk.
‘Aizawl Tlang Ruam 2025’ hi November-a nei tum niin, Upper Republic atanga ITI kawn thleng tlan tura ruahman chhin a ni. Intlansiakna kawng (route) piahlamah media coverage leh inbuatsaihna dang pawh international standard veka kalpui tum a ni. Event pumpui hi Jio TV kaltlanga live-a pekchhuah tum a ni.
Aizawl Tlang Ruam chu kuminah lian leh huamzau zawk, intihsiakna kalkawng pawh harsa (challenging) leh thui zawka buatsaih tum a ni tih minister hian a sawi a. Tlang Ruam chu India leh khawvel hriatah a tha zawnga Mizoram phochhuahna remchang leh pawimawh tak a ni, tiin, sports intihsiakna a nih piahlamah mipui tan intihhlimna, mi tamtak tan eizawnna siamtu leh tourism-a hmasawnna thlen theitu ni bawk a nih avangin, lian leh ropui zawka ti tur chuan theihtawp chhuaha tanrual a ngai tih a sawi a ni.
‘Red Bull Aizawl Tlang Ruam’intihsiak vawihnihna nei dawn
