Thawhlehni zan Champions League quarter-final second leg match pakhata 2-1-a Barcelona-in mualneitu Atletico Madrid an hnehna inkhel second half minute 79-a mikhual player Eric Garcia hnawhchhuah a nih hnuah Barca forward Raphinha a lungawi thei lo a, last eight match hniha referee-te thutlukna avanga semi-final lut zo lo an nih thu leh match official-te khan an rawk nia a ngaih thu a sawi!
Referee Clement Turpin-a’n Madrid khawpuia Garcia a hnawhchhuah hma Nou Camp first leg-ah pawh khan referee Istvan Kovacs chuan Pau Cubarsi a lo hnawtchhuak tawh a, kha mi tum phei kha chuan si hnih fai ngawtin mualneitu Catalan team kha an mikhual Atleti lakah an tlawm nghe nghe!
He match hniha inhnawhchhuahna thleng hi yellow card phawrh zet hnua khelmual sir monitor en hnua red card-a thlakthleng ve ve a ni.
First leg-ah khan Atletico defender Marc Pubill chu an lam penalty area chhunga a handball chungin referee Kovacs leh video assistant referee Christian Dingert-te khan ham loin game kal lai an khelh tlangtir a, Barcelona player-te’n na takin referee kha an lo sawisel tawh nghe nghe.
Hliam avanga last eight game hnih khel thei lo ber Raphinha a lungawi thei lo a, second leg an khelh zawh khan reporter-te hriatah quarter-final match hniha referee-te ham dan na taka sawiselin, Barcelona an rawk ti hialin a sawi!
Brazilian chuan: “Keia lo ngaih ve dan chuan he match-ah hian rawk kan tawk a, he match chauh pawh a ni lo, first leg pawh kha chuti tho.
“Ham dan (refereeing) kha a chhe thlawt a, Turpin-a thutlukna siam phei kha chu a awihawm loh tial zawk.
“Atletico player-te foul zozai kha ka hre seng lo a, mahse, referee khan yellow card pakhat lek pawh zu phawrhkhum lo a!
“Heti tak maia Barcelona chak leh tlang zel an hlauh chhan hi ka hre duh takzet a ni,” a ti piap piap!
Ve bawkin, second leg-ah pawh khan Atletico player pakhat mahin card an hmu lo a, Barca lam thung khan yellow card leh red card pakhat ve ve an hmu thung.
First leg-ah kha chuan Atletico player pathumin yellow card thununna an dawng.
Referee-in min rawk: Raphinha
