‘Rei daih Kawngpui’

MNF |halai chuan kar kalta Ningani khan Aizawl khawpui chhung kawng thenkhat chhe zual lai an siam a. MNF hruaitu pakhat chuan, Aizawl khawpui kawng chu MNF sawrkar laia an siam, hun a lokal deuh hnuah traffic heavy lutuk avangin an kawng siam chu kum tin danin repair a ngai thin a, ZPM sawrkarin, kawng siam ve chu sawi loh, mi kawng siamsa pawh thawm tha thei lo kalphung thar an nei chu a vanduaithlak hle, tiin a sawi a.
Mizoram kawngpui tam zawk hi chu ‘kum tin repair ngai’ a ni ber a, hei hi Mizoram kalphung nghet chu a ni deuh mai awm e. Zep thu a cheng lo a, ‘daih rei kawngpui’ siam thei sawrkar hi Mizoram mipuite hian kan la hrawn lo niin a lang. Kum tin hian, taxi association, truck association, khawtlang, political party etc. te hi kawng chhia thawmthat hnatlang neiin an phu suau suau kum tin a ni ber a. A chang chuan kawng chhiat avanga damlo phur lirthei, kawnglaka tangkhang ta leh chumi avanga thihna hial thleng te pawh a lo awm tawh a nih kha.
Kawngpui hi state dangte pawhin an siam ve vek a, mahse kum tin repair ngai khawpa kawngpui siam thin hi chu an awm ve ange maw? An lo awm a nih pawhin kan ‘level pui’ an ni tihna a ni mai ang a, an tam lovang, awm pawh an awm ngut dawn em maw ni?
Mizoram kawngpui a that rei theih loh chhan hi, a siamna tur sum mipuiin chhiah kan pek tlem vang emaw a ni hran lo va, India ram mipui chhiah pek tlingkhawm atangin kawngpui siamna tur pawisa hi Mizoramin kan dawng a, kawngpui tha tawk tak, alo berah kum nga (?) tal repair ngai lo tura siam theihna sum hi central sawrkar atangin kan hmu thin a, kum khat daih tawk lekin kan lo chhuah thin ni maiin a lang.
Kawngpui chhia thawmthat hna hi mipui lam hian kan thawh thin avangin sawrkar pawh hi a inthlahdah phah em maw ni tih mai tur a ni zo tawh a, mipui lam pawhin tha taka kawngpui siam tura sawrkar ‘nawr buai’ aiin ‘hnatlang buai’ hi hlawk zawk tawha ngaihna kan nei zo tawh a ni awm e.
Tun sawrkar thar hian chance tha tak mai a nei mek a. Tuna thla sawm vel sawrkarna an chelh chhunga sawrkar hmasa kutchhuak an la thawm that theih lohna hi chu lo dah tha ta ila. Sawrkar kal tawh zawng zawngin an tih theih loh leh an tih ngai loh ti thei tur dinhmunah an ding mek a, ‘repair ngai lova kum nga tal daih thei kawngpui tha’ siam thei sawrkar ni turin an hun a intan chiah a ni.