Rei tak nghah tawh Tejas Mark 1A engine dawng ta

Rei tak nghah tawh Tejas Mark 1A engine dawng ta
Rei tak nghah tawh, General Electric-in an siam F404 engine, kawng hrang hranga hman theih, Light Combat Aircraft (LCA) Tejas Mark 1A-a vuah tur chu Ningani khan India a thleng ta a. Engine dawn pahnihna hi sorkar hnuaia indo thlawhna siamtu, Hindustan Aeronautics Limited (HAL)-in a dawng a ni.
Tejas Mark 1A hi Indian Air Force (IAF) squadron pahnih, No. 45 Flying Daggers leh No. 18 Flying Bullets ten an hman mek, Tejas Mark 1 tihchangtlun a ni a. HAL hian tangka kum kal mek chhungin GE-404 engine hi 12 dawng hman tur an ni tih thuneituten an sawi.
IAF hian LCA Mark 1A fighter jet 83 a hauh lawk tawh a, a vaiin 97 lei turin defence ministry chuan phalna a pe tawh bawk a. Hetih lai hian a khawlpui ber, G3 F404-IN20 hi dawn hun tura tih aia kum hnih dawna tlaiah dawn tan chauh a ni.
IAF hian an MiG-21 hman mekte chu September atanga chawlhtir an tum tawh a. A chawlh hnuah chuan Nal Air Base, Rajasthan-a awm squadron pahnih chiahin Tejas Mk1A fighter jet hi an kawl dawn tihna a ni a. MiG-21 hi hluihlawn a nih chuan squadron 29 chauh awm tawhin IAF-in a neih tlem lei ber a ni dawn bawk a. Squadron 42 nei thei niin squadron tinah indo thlawhna 18 awm thei tur a ni.
Nikum March 28 khan test pilot, Group Captain KK Venugopal (Retired) chuan Tejas Mk1A hi van sangah minute 15 chhung a lo thlawhpui tawh a, a vawi khat thlawhnaah hian duhthusamin a che.
He indo thlawhna hi system thar hmanga duan niin HAL chuan technology thar ber ber belin a hmelhmang pawh indo thlawhna awm tawhte laka hrang tur a ni.
A hmasa aiin India kutchhuak pawh 50% dawnin a tam tawh zawk dawn a, a hmaa mi aiin changtlunna 40 vel a nei dawn bawk a. Tejas Mk1A hian Israel EL/M-2025 AESA Radar a chhawm dawn a. Bharat Electronics Limited leh HAL inkawpin an siam, Uttam AESA Radar chu a thlak ang.
Uttam Radar hian a bitum tur tam tak chhui zui theiin thlawhna kil hrang hrang atanga km 200 chuang thlir phak a ni a. Tejas Mk2 ang chi version thar leh Twin Engine Deck-Based Fighter (TEDBF)-ah hman leh a ni dawn a ni.
Mk1A hian ralthuam kah chhuah mai theihna hmun kuaah neiin a dulah pawh Beyond Visual Range (BVR) missile, Air-to-Air/Ground missile leh Advanced Short Range Air-to-Air missiles (ASRAAM) kah chhuah tur a pai dawn a ni.