Rel chawlhhmun chim vangin mi 14 boral
Serbia hmar lama rel chawlhhmunah chhiatna thlengin mi 14 in an boral phah a, he rel chawlhhmun hi concrete a sak niin, mi tam tak a chim hnan thu leh boral zingah hmeichhe naupang kum 6/7 bawr vel mi pawh a tel thu an ram president Aleksandar Vucic chuan a sawi.
Rel chawlhhmun chim hi an khawpui pahnihna Novi Sad-ah niin, an chim lai hian pawn lam building hnuaiah mipui tam tak an awm a, hei hian nunna chan pawh a tih tam phah niin an tualchhung reporter te chuan an sawi. He thil thlen hun hi an ram sana zirtawpni chawhma dar 11 vel a nih thu an sawi bawk.
President Vucic chuan thi zat chu an awm belh tawh loh hram a beisei leh duh thu sawiin, damdawiinah hliam na zual pathum an awm mek thu a sawi a, a mawhphurtute chu hrem ngei an nih tur thu a sawi.
Chhanchhuah hna hi mi 80 chuangin chhun zan zawmin an thawk reng a, mihring tang zat hriat theih a nih mai loh avangin an thawk rim hle tih thuneitute chuan an sawi bawk.
He rel chawlhhmun building hi kum 2021 khan siamthat niin, kuminah pawh siamthat hna thawh leh a ni a, July ni 5 khan hawn a ni chauh nghe nghe.
Rel chawlhhmun chim vangin mi 14 boral
