Rel kâng emaw tia zuang chhuak mi 12-te relin su hlum

Rel kâng emaw tia zuang chhuak mi 12-te relin su hlum
Maharashtra-a Jalgaon-ah Nilaini tlai khan relah kangmei a chhuak tih thawm a awm avanga chiaia zung chhuakte chu rel dangin chil zuiin mi 12 vel an thi tih hriat a ni tawh.
Chhiatna hi Mumbai atanga km 400 vela hla, Pachora bula Maheji leh Pardhade station inkara thleng a ni a. Lucknow-Mumbai Pushpak Express rel, ni tin Lucknow leh Mumbai inkara tlan thin rel chak chi hi tlai dar 5:00 velah a chhungah kangmei a chhuak nia sawi a awm avangin dintir a ni tih Central Railway thuneitute chuan an sawi
A chuang thenkhat chiai chu rel atang hian an zuang chhuak a, Bengaluru leh Delhi inkara tlan Karnataka Express rel lo tlan ve chiahin a su ta niin Central Railway thupuangtu, Swapnil Nila chuan a sawi.
“Kan hriat tawh chinah chuan Pushpak Express-a pindan pakhatah hian axle sa lutuk emaw, a tihdinna tang emaw avangin nasa takin tek a awm a, a chuang thenkhat hi an chiai zui ta mai niin kan hria a. Rikruma a tihdinna chain an pawt a, thenkhat chu an zuang chhuak ta a, hetih lai hian Karnataka Express hi a bul kawngah a lo tlan ve chiah si a ni,” tiin railway thuneitu sang pakhat chuan news agency PTI a hrilh.
Bhusaval atangin rel chesual a awma puitu tur rel dang tirh a ni nghal tih Central Railway chuan a sawi a, hliam tuarte enkawlna tur mamawh pawh ruahman vek a ni tih a sawi.
Thlalak thehdarh thenkhatah chuan ruang let te, a bula thisen kaia lo awm reng te pawh hmuh tur a awm.
Swiss ski resort khua, Davos-a World Economic Forum-a tel mek, Maharashtra Chief Minister Devendra Fadnavis chuan thite hi Rs nuai 5 theuhva ral an nih tur thu a puang nghal.
“A chuang thenkhat hian rela meikhu chhuak chu mei emaw an ti a, an zuang chhuak ta mai a. Vanduaithlak takin rel dangin a lo su ta si a ni,” tiin video-a thuchah a sawiah chief minister hian a sawi.
State sorkarin hliam tuar zawng zawngte enkawlna a tum vek dawn tih a sawi bawk.
“Kan minister, Girish Mahajan-a chu chhanchhuah hna leh a tuarte enpui zui hna thawkin a awm mek a. District thuneitu leh police hotute pawh ka be tawh a ni,” tiin chief minister chuan a sawi bawk.
Union Home Minister Amit Shah pawhin chhiatna thlenga thi an awm pawi a tih thu leh chief minister nen pawh an inbiak tawh thu a sawi.
“Jalgaon, Maharashtra-a rela chhiatna thleng hi a pawi tak zet a. Chief Minister Devendra Fadnavis nen pawh inbiain thil thlen dan ka lo hre tawh a. Tual chhung thuneituten hliam tuarte puih theihna zawng zawng an ti a. Thi chhungte ka tawrhpui a, hliam tuarte pawh rang taka lo dam leh turin ka duhsak a ni,” tiin Shah chuan X-ah a tar lang.
Railways Minister Ashwini Vaishnaw pawhin Railway Board chairman leh thuneitu sang dangte chu titipui nghalin hliam tuarte chu kan thuai turin a ti ve bawk.