Rel kawng paltlang ram neitu
mi 13-in complaint an thehlut
Sairang thlenga rel lut tura ruahman mekah a kawng sialna in a paltlang tura ram lak chin pawnlama chetnaah heng ram neitu mi 13 chuan a tul anga hma laksak tura ngenna an thlen tawh.
Bairabi leh Sairang inkar rel kawng siam mek hmalaknaah Zirtawpni khan Kolasib district bawrhsap Robert C Lalhmangaiha hoin district hotute, Indian Railways hotute leh rel kawngin a paltlang village council-te an thukhawm a. Rel kawng siamna atana mimal ram lak chungchang sawiin, chinfel ngai la awm chu chinfel a nih theihnan chak taka hma lak nise, an ti. Rel kawngin a paltlang tura ram lak chin pawnlama hmalakna hrang hrang awm nia sawi chungchangah Hortoki, Mualkhang leh Khamrang huamchinah mi 13-in complaint an thehlut tawh tih sawi a ni a. Rel kawng contractor-te hnathawhna avanga mimalin harsatna an tawh, rel kawngin a paltlang khaw hrang hranga VC-ten report pe in sawiho a ni bawk.
Rel kawngin a paltlang ram neituten zangnadawmna an la dawn kim loh chungchang Bairabi atanga Sairang inkara relin a hman tur electric ban phunna mimal ram compensate la dawng lo leh railway company-in a la chhinchhiah loh hmun thenkhat a awm tih sawi a ni a. Hun remchang hmasa berah district collector, Indian Railways hotute, rel kawngin a paltlang VC-te leh ram neitute nen joint verification neih nise, an ti.
Railways hotute chuan 2025 March 25-ah Mualkhang thlenga rel luh tir theih an inbeisei tih an sawi bakah Jamira, Hailakandi district Assam-a rel kawng chhia avanga Mizorama rel lut thei lo chu siamthat ni tawhin, bungraw phur rel a kal tawh a, passenger rel erawh a la kal rih lo tih an sawi a ni.
Rel kawng paltlang ram neitu mi 13-in complaint an thehlut
