Rel kawng siam mekah bungraw liantham tak tak bo thin chu state pawn lam mite pawikhawihna a nih theih thu sawi a ni.
Kolasib bawrhsap John LT Sanga hoin Kolasib district chhunga Northaast Frontier Railways hmalakna thlirletin harsatna an tawhte sawihoin Thawhtanni khan Kolasib-ah thutkhawm a ni a. Kolasib SP bakah district thuneitu dangte leh NF Railways hotute an tel.
Thutkhawma report danin, rel kawng siamna hmanrua tum engemawzah a bo tawh avangin Bairabi Police Station-ah FIR 10 leh Kawnpui Police Station-ah FIR 17 thehluh a ni tawh a, bungraw bo hi hmuhlet a nih theih nan theihtawp chhuah a ni. Bungraw liantham tak tak bo a awm thin avangin pawikhawitute hi pawnlam mi an nih theih thu sawi a ni a, bungraw dahthatna rintlak tak siam dan tur leh uluk zawka vil dan tur sawi a ni.
Bairabi khaw bul Tunnel No.1 atangin electric wire thahnem tak leh bulb engemawzat a bo tih Railways hian an sawi bawk.
Rel hmanga inkalpawhna tha zawk, tangkai taka hman thuai a nih theih nan bungraw bo zawnchhuah leh pawikhawihtute hrem an nih ngei theih nan Kolasib district-a thuneitute chuan theihtawp an chhuahpui zel tur thu an sawi a. An harsatnate a hmun ngeiah an enpui tur thu bawrhsap leh SP te hian an sawi.
Kumin July chhunga Hortoki thleng rel luh tir tura NF Railways hmalakna chu lawmawm an tih thu sawiin, relin a paltlang tur khaw mipui pawh lo inhmakhua lawk a pawimawh tih sawi a ni.
Thutkhawmah hian rel kawng siamna bungrua dahthatna rintlak ruahman dan leh a vil turin khawtual mi rintlak dah ngei a nih theih dan zawn pawh rel a ni bawk.
Rel kawng siamnaa bungraw lian rutu ah pawnlam mi ring
