Sairang thlenga Mizorama rel rawn lut turah Kawnpui Joint Village Council chuan a paltlang tur khuaa chengte tan hriat tur tul inhrilhhriat lawk tam an duh.
Kawnpui Joint Village Council leh Thingdawl Village Council chuan July 13 khan Kolasib district bawrhsap Robert C Lalhmangaiha an hmu a, an huamchhunga kawngpui siam mek bakah rel lut tur chungchang hi an sawipui.
Kawng siamthat mekah RTP Sethawn leh Kawnpui inkar lirthei veivak tana harsatna an tawh thinah rawtna an thlen a. NHIDLC hnuaia contrcator-ten Sethawn leh Kawnpui inkar kawng an siam mekah one way-a lirthei tlantir chu, bungraw phur lirthei leh ke 16 nei lirthei lian tan kal hun bik siam a, an lo nghahna tur pawh kawng siam mek atanga km. khat pawnlam nise tha an tih thu an thlen a, a bulhnai lutuka an din chuan traffic jam a siam nasa tih an sawi.
Kawng siam meka lirthei vakvel buaipui turin duty tam zawk dah tul an tih thu an thlen bawk. Bualpui leh Kawnpui inkar bik chu school leh office kal hun laiah harsatna a awm loh nan duty-ten ruahmanna tha zawk siam se, an ti. Heng harsatna awm chinfel theih nan July 17 & 18 hian bawrhsap hoin NHIDCL nen a hmunah enho nise an ti.
Bairabi atanga Sairang thleng rel lut turah NEF Railways lamin Kawnpui ram chhung thleng trial run an nei tawh a, Kawnpui leh a chhehvel mipuiin rel lo lut tura an hriat tur tul an lo hriat lawk theih nan bawrhsap leh Kolasib SP hoin khawtlang hruaitute nen sawi ho a, a tul anga a hmunah pawh en ho nise an ti a ni.
Rel lut turah VC-in inpuahchah duh
