Rel Station leh bawlhhlawh…

Bairabi—Sairang rel kawng hawn a han ni a, Delhi, Kolkata leh Guwahati service an tlan tan chauh a, Sairang rel station-a bawlhhlawh thehthang dan fel lo chu social media lamah a viral a; “Sairang Railway Station: It is just 2 days since opening for the public. This is the current situation! Lack of Civic Sense!” tiin.
Hei bakah hian, Sairang rel stationa kutdawh pakhat hlimthla tihlan a ni bawk a. “Engtin nge state pawn atanga lo lut kutdawhin ILP a neih theih?” tih zawhna chu social media lamah a darh bawk!
BJP Mizoram chuan nimin khan Seva Pakhwada Program kal zelah Sairang Railway Station tihfai hnatlang neiin, he hunah hian State hruaitute bakah member thahnem tak an thawk chhuak a, a lawmawm hle.
Aizawl khawpui traffic discipline thatzia te, mipuiin traffic rules an zawm that thu te, khawpui danga bengchheng em em thin ‘lirthei horn’ ri hriat tur a awm ve loh avanga ‘silent city’ tia Aizawl hming an vuah dan te pawh kan hre thin ang. A nihna takah chuan ‘fak’ kan hlawh nasa hle a ni. Nagaland khawpui Kohima pawhin Aizawl hi an entawn tawh, a tih theih awm e.
State dang entawn tlaka hmingthatna kan neih mek laiin, Railway Station thar tawp thu social media lama a darh leh ta mai hi a zahthlakin a tlawmthlak hle a. Chawlhkar khat em pawh a ral hmaa “Lack of Civic Sense” tih ngai khawpa hnuhma kan nei nghal mai hi a pawi hle.
Rel kawngin Sairang a rawn thleng dawn tih kan hriatna a rei tawh a, ILP kan buaipui khu luai a, mahse thildanga lo dawnsawn dan turah ruahmanlawkna kan nei chau hle tih a lang chho zel a tih theih awm e.
Eng pawh ni se, insiam rem har lo turah ngai ila. Lengpui Airport pawh MHIP lamin an chei (beautify) a, hmuh a nuam tawh hle. Mizoram rel station tin (Sairang, Mualkhang, Kawnpui, Hortoki, Bairabi) te pawh hi a awmna district theuh hnuaia pawl hrang hrangte hian Mizoram hmelhmang lanna pawimawh tak a nih avangin a chhiat a thatah mawhphurhna inpe thei ila a duhawm dawn hle. Sawrkar chuan a eng akimah mawhphurhna a nei sa hrim hrim a, tun thil thleng atang hian chak takin tul leh mamawh a bawhzui nghal turah ngai ila. Kan tan tlan chuan, India rama railway station fai, thianghlim leh nuam ber pawla siam theihna chance kan neiin a lang.