Relationship bul \an tir te tana hriattur pawimawh

Relationship bul tan tir te tana hriattur pawimawh
Mipa leh hmeichhiain romantic taka inlaichinna bul kan tan lai vel hi a nuam kan tiin, kan hriat reng thinte zinga mi a ni. I tana mi special tak mai i tawng a, ani nen chuan bul intan ta a, romantic taka inlaichinna bul kan tan lai hian fimkhur a tul hle a ni.
In pahnih inkar boruak chu a kal thui tak tak hmain ngaihtuahna i sen a pawimawh khawp mai, in pahnih khan in inkawp rem thei ang em? I kawppui awm mi a ni em? In hlim dunin i ring em? tihte pawh ngaihtuah hmasa thei la, nakina buaina leh natna awm thei tur tam tak i pumpelh ngei ang.
Ngaihzawng nei turin i inpeih em tih ngaihtuah hmasa phawt rawh. A bik takin kawppui nena inthen hlim in nih phei chuan hei hi ngaihtuah hmasak a pawimawh khawp mai. Kawppui te kan then hlim chhawnah hian kan lungleng khawharin tu tang belh tur emaw kan tawn hmasa kha ngaihtuah thui vak mang lo a pawm nghal mai a awl khawp mai. Mahse, hetiang inlaichinna hi chu rebound mai a ni a, inlaichinna a hrisel tak tak thei lo. Chuvangin romantic taka tu emaw nen inlaichinna inneih dawn chuan, kha inlaichinna insiam tur khan a tihlim che em, nangmahah inthiam lohna emaw nuam lo tih ruk riauna te a awm em tih kha ngaihtuah hmasa ang che.
Eng vanga inlaichinna chu neih duh nge i nih tih pawh hriatchian a pawimawh khawp mai, chutiang bawkin chu inlaichinna atang chuan eng nge i beisei tih te pawh ngaihtuah hmasa ang che. Intihhlim nan i ti mai mai a nih chuan, chu chu i kawppui pawh chu hriattir rawh, anin a lo lak serious viau si chuan nakina buai lehna mai mai tur a ni.
Relationship counsellor Sauleha Shaikh chuan, “Inlaichinna bul tan dawna pawimawh ber chu thil sawi dun tam hi a ni. A tir atangin engkim i hrilh chiang u la, engmah zep loh a fuh zawk a, chu chuan in inkar boruak a tinuam zawk ang,” a ti.
|hian anga inkawm nel hmasak theih hi a tihchi khawp mai. |hian anga inkawm hmasa kher lo pawhin lo inhmelhriat lawk a, innel sa theih chu duhthusam a ni. Inthiante kaltlanga intawng in nih chuan ngaihzawng anga inmelh nghal ngawt loin thian angin inkawm hmasa ula, inhmelhriat hmasa te te ula, chu chuan in hmalam hun atan kawng a sial ang. Engmah inhriatchianna pawh nei hmasa lo va, zankhat intawnna atanga inngaizawng nghal ringawt te chu an inngaihzawnna boruak a kal tluang tak tak thei lo va, inngaihzawn nawmna leh hlimawmna tak tak an pawh ve thei lo thin a, an inkarah buaina neuh neuh a tam duh bik.
Kan duh zawng tak an nih pawhin vawi lehkhatah inngaihzawn nghal thut mai chu a fuh lo tlangpui. Chuvangin romantic taka inlaichinna nei turin hmanhmawh rum rum lo va, inhrechiang a, inbelchiang hmasaa thil tih hi a hnua kan tana tha zawk a lo ni thin.
Chutihrualin engmah tilang lo va awm reng erawh a pawi leh viau si ang. I duhna te chu i tilang ngei tur a ni a, a hriatthiam theih ngei turin i tilang tur a ni. Min duh ve nge min duh ve lo tih a ngaihtuah buai reng a tul a nih chuan, a rilru a chiang thei lo a, midang a belh san leh si ang che.
Inhriatchian leh inbelhchian hmasak a pawimawh kan tihrualin, inhriatchian tuma pehhel kual rei lutuk te, inbelhchian chhung rei lutuk te chuan kan inlaichinna siam tur kha a tibuai ve zawk hlauh thei bawk si a nia. Chuvangin, inhrechianga inbelchiang turin rei tak hun kan mamawh kher lo tih hriat tur a ni.