Vawk hri African Swine Fever (ASF) a leng a, Remal cyclone a tleh bawk. Remal cyclone hian ruah a keng a, Mizoramah ruah namai lo tak a sur. Chu thlipui leh ruah chuan vawiin thlengin Mizoram a la tibuai a, rin loh lamah nghawng a nei a ni mai thei – ASF lam pawh a lo nghawng nia ngaih a ni tlat mai!
Mizoram Excise & Narcotics (MEN) departmeRemal cyclone leh a ruah tui ken vang hian ASF hrileng hi a darh phah nia ngai an awm a, AH&Vety department lam pawhin hetiang ngaihdan hi a awm thu an sawi.
AH&Vety department hotu thenkhat, ASF hrileng buaipui hnathawkte’n Remal cyclone leh a ruah ken vang hian ASF hi a darh a ni ang tih ngaihdan a awm thu an sawi a, science hmanga finfiah ni lo mah se he ngaihdan hi thil ni thei a nih thu leh, Mizoram dinhmun enin a nih hmel riau thu an sawi.
ASF hri hi boruaka lenga darh a ni lo a, vawk leh mihringte put darh a ni tih thin a ni. Amaherawhchu, boruakah hian a leng lo tawp a ni lo a, tawi te chu a leng ve. Mihringte angin vawk hi an inkalpawh ve lem lo a, an hri kai pawh tawi te chauh boruakah a leng a nih chuan boruaka lenga darh turah ngaih a ni lo. Mahse Remal cyclone a lo thawh kha, thli na tak a tleh a nih chuan a hmaa boruaka thui lo tak leng thin kha thui zawk a leng ang a, chuvang chuan he hri hi hmun thenkhatah a darh a ni ang tih ngaihdan a awm. Chu chu AH&Vety department-a thawkte sawi dan a ni.
“Thli speed a san chuan hri darhna chance kha a awm a, hri kha a thleng thui sawt dawn a, chutiang vang chuan hri hi a darh a ni ang tih theih turin hmun thenkhatah thil a awm tlat a,” vety doctor pakhat chuan a ti.
“Chutiang chu thil ni thei a ni a, nih hmel riauna hmun a awm bawk a,”a ti bawk.
Remal thlipui khan ruah a keng a, ruah nasa tak a sur a nih kha. Tui a lian a, chu chuan ASF hri darhnaah nghawng a nei a ni ang tih ngaihdan pawh a awm.
“Tuihawk a lo tam a, khatia tuihawk a lo tam khan hmun thenkhatah ASF a darh phah a ni ang tih theih a ni a. Chutiang ngaihdan chu a awm. Vawk thi kha tute emawin lo paih se, tuihawk khan a len ang a, hri a darh a ni ang tih rin dan a awm,” vety doctor pakhat chuan a ti.
“Vawk in hnuaiah tuihawk a luang thei a, chutiang te pawh chuan hri hi a keng a ni em maw’n le tih zawhna a awm,” a ti a, Mizoram hmun thenkhat, chutiang nih hmel deuh awmna chu a awm thu a sawi.
ASF hrileng kumina mi hi a nasa telh telh a, mahse AH&Vety department lam chuan a zia thuai an beisei. Fur a lo thleng ang a, ruah tui a tam ang a, a zia mai ang tih beiseina an nei.
Hei hi, ruah a sur chuan khua a lo dai a, khaw lumah aiin khaw lum lovah hri hi a nung thei lo zawk a, chuvang chuan ruah a sur chuan ASF pawh a zia ang tih beiseina a ni.
Remal cyclone vangin vawk hri darh?
