“Kum 20 chhung ram a buai a, hmasawnna hna a kal thei lo. Ram buai a reh a, remna leh muanna hnuaiah hmasawnna a chak…”
Remna Ni a lo thlenin, a chunga thu khi ram hruaituten an sawi dan tlangpui a ni awm e. Rambuai chanchin chu kan hriat vek tawh kha.
Ram a buai chhunga hmasawnna hna thawh theih a nih loh avanga Mizoramin a hnufual phah thu te, state dang um pha tura tan lak a ngaih dan te, chumi atan chuan Mizoramin duhsak bik a phu thu te hi kan ram hruaituten sawrkar laipui hotute an dawr changa an sawi rik thin a ni bawk.
Kum 20 chhung ram buai chhuanlam chunga sawrkar laipui pawisa kan dil tlut tlut hnuah, kum 40 zet a vei leh ta. Kum 40 chhung hian hmasawnna hrang hrang chu a awm e; mahse, kum 40 chhunga ei leh bara kan la intodelh thei lo hi chuan rilru a kap lian ta hle.
Ram a buai chhan kha, a bul ber chu ei leh bar tlakchhamna vang nia sawi a ni. Ram hruaituten kum 50 dana Mizoramin mautam tam a tawrh thin dan an hrilhfiah chung pawhin India ram hruaitute ngaihsak kan hlawh lo. Mau a tam a, ei bar kan tlachham ta, India ram chhunga cheng, India khua leh tui kan ni ve reng chung pawh khan, India sawrkarin min hmu ‘Indian’ ve lo te pawh a ni ang e, mahnia ro inrel ve mai duhna thinlung a lo pian phah a, a tawi zawngin, kan inkap ta a nih kha.
Tichuan, ei leh bar harsatna avangin ram a buai a, kum 20 hnuah remna leh muanna a thleng leh a. Remna leh muanna a thlen atanga kum 40 a ral leh tawh hnuah pawh, kha ram buai chhan ‘ei leh bar’ thil kha kan theng thawngah a lut zui ta reng reng lo tihna a ni awm e. Inkah buaina a thlen lai pawh khan, ‘riltam a huai theih loh.. bla bla…’ tih tawngkam kha a awm thin a ni lo’m ni kha?
‘Remna leh muanna hnuaiah hmasawnna a chak…’ kan tih apianga ‘hmasawnna’ tia kan sawi hian ‘ei leh bara intodelh’ hi a huam tel ve ngai reng reng lo tihna a ni a, a pawimawh hmasa ber a ni reng si a. Hmasawnna dangte chu lo awm pawh ni se, a tha e, i lawm ang u, mahse ei leh bar bera kan intodelh si loh chuan, hma kan sawn ti mah ila, hmasawnna tluantling a ni thei lovang.
Ei leh bar han tih hian, kan rin pui ber buhfai; chawhmeh lamah- thlai leh sa chi hrang hrang hi a ni mai. Hengte kan intodelh loh avanga state dang atanga kan chawkluhna sum leh pai luang ral zozai hi a uiawm hle a nih hi. MLA 40 rual leh sawrkar hnathawk singnga rualin an enkawl mek Mizoram mipui hi, state dang district pakhat population zatve pawh pha lo kan ni. Kan ram leilung lah chu, khawi hmun pawh ‘thlai tana tha em em vek’ kan ti a ni lo’m ni? A uar zual phei chuan, thirtiang pawh sawh phun ila, a nung hial awm e’ an lo tih thin a ni. Remna leh Muanna hi ‘Ei leh Bara Intodelhna’ hian chhawr tangkai ve tawh se a duhawm hle a nih hi.
Remna hnuaia hmasawnna chu?
