Kumtir lam khan Forbes-in American hmeichhe zinga mahni kut kawih ngeia hausa zual an thlan chhuah zingah 48-na a ni tawh a, kum chawhnu lamah ‘Renaissance’ tour pui takin a nei zui a, tunah pawh Beyonce pawhin billionaire nih a hnaih ta.
Forbes-in a tarlan danin Beyonce hian kumin bikah dollar maktaduai 300 dawn a thawk chhuak tawh a, tichuan a hausakna hi dollar maktaduai 800 chuang a tling ta a ni.
June thla khan Forbes chuan Beyonce hausakna hi dollar maktaduai 540 angin an chhut a, kuminah sum a hai lut tha hle a, chu chuan a hausakna pawh a rawn vawrh sang leh ta dawrh mai a ni. Beyonce sum hmuhna lianah hian a music catalog leh art collection te pawh a tel a, tuna Forbes-in an chhut thar leh danah chuan a music catalog hlutna hi dollar maktaduai 300 velah an dah ta. Hei bakah hian Beyonce sum hmuhna lianah hian a pasal Jay-Z nena an sumdawn dunna Parkwood Entertainment company pawh a tel a ni.
Forbes chuan real estate lamah Beyonce hlutna hi dollar maktaduai 320 angin an chhut a, chutah chuan Malibu, California-ah a in ropui, dollar maktaduai 200 man anga an chhut pawh a tel a, he in hi June thlaa an lei a ni a, California history-ah mimal chenna inah chuan a man to ber niin an sawi.
Beyonce hian May thla atanga October thla thlengin kuminah tour a nei a, hetah hian ram hrang hrang 17 tlawhin, show vawi 39 a nei hman a, chuta a hmuh chu dollar maktaduai 579 a tling a, kum khat chhunga zaithiam tour atanga sum lalut tum ber pawl a tling. Hei bakah hian Renaissance: A Film by Beyonce pawh box office lamah a che tha thawkhat viau bawk. Beyonce hian kum thar lamah a tour hi a la chhunzawm zel dawn a, nakkum-ah chuan a bellionaire thei tawh ngeiin a rinawm.
‘Renaissance’ tour avangin Beyonce a billionaire hnai
