Mizoramin energy – kawlphetha leh tuialhthei renchem zawk leh daihzai zawka a hman theihna tur ruahmanna, State Energy Efficiency Action Plan (SEEAP) chu Power & Electricity department hnuaia State Designated Agency (SDA) Electrical Inspectorate, Zuangtui buatsaihin Nilaini khan sawm bikte hmaah phochhuaha tlangzarh a ni.
SEEAP hi sawrkar laipui Ministry of Power Bureau of Energy Efficiency (BEE) kaihhruaia Mizoram tan Deloitte leh Green Tree chuan zirchiangin energy hrang hrangte renchem leh daihzai zawka hman a nih theih dan tur ruahmanna leh kalphung tur a buatsaih a. Khawvel lum belh zel tur dona kawnga India hmachhawp neihte tih hlawhtlinna tura Mizoramin a phak tawka hma a lak theih dan tur kawng hrang hrang ruahman a ni.
Hemi atan hian building sector, industry sector leh transport sector te thlang chhuakin, energy – kawlphetha leh tuialhthei renchem leh daihzai zawka hmanral a nih theih dan tur kalphung leh kaihhruaina duan a ni a. Mizoramin hmalam hun atan pawha boruak chhia tichhuak tlem zawka hmasawnna kawng a zawh theihna tur a ni.
He hmalakna hian kum 2030- 2031 thlenga energy renchem chungchanga zawm mai theih tur leh tihhlawhtlin nghal theih tur ruahmanna zirchiangin rawtna a siam bawk.
Renchem leh daihzai zawka Energy hman dan tur duang
