India ramin ama puala danpui a hman tanna ni, Republic Day 2025 chu ram chhung hmundang rualin Mizoram hmun hrang hrangah January 26 – Pathianni khan lawm a ni a. Aizawlah chuan Sipai Lammualah larsap Gen Vijay Kumar Singh (Retd) chuan India hnam puanzar pawtparhin parade contingent 23-ten hnam puanzar zahna chibai an buk a chhanlet hnu ah thu a sawi. Larsap chuan Republic Day vawi 76-na pualin Mizoram mipui duhsakna chibai bukin, “He ni pawimawh takah hian kan tana hman tur danpui kan insiamsak a, hei hian dikna, zalenna leh intluktlanna min pe a ni,” a ti. Danpui leh zalenna kan neih theihnana theihtawp chhuahtute chu he ni ah hian hriatreng an ni, tiin, India ram inpumkhatna leh inunauna tichaka vawnnun tum turin mipui a sawm. Mizoram chu state ralmuang tak kan la ni thei zel a. Hmun thenkhatah harsatna tlem awm thin mah se, venhim hna thawktu Mizoram Police-in uluk taka an vil thin avangin state chhung boruak muanawm tak kan nei tih sawiin, “State leh state inkar ramri ah ngawrh takin venhim hna an thawh avangin ral a muang a. Assam nena ramri chungchanga inbiakna pawhin hma a sawn zel a ni,” a ti.
Thenawm ram nena kan inrina humhim turin Mizoram Police chuan ramri vengtu Assam Rifles leh Border Security Force nen tanghoin ngawrh takin venhim hna an thawk a. Dan phalloh thil lakluh tleh ramria buaina dang chhuak thei ven kawngah hna an thawk tha hle tih a sawi. Dan loa thil tih leh ruihhlo do kawngah sawrkar, NGO, kohhran leh khawtlangin thlah loa tanho zel a pawimawh tih a sawi a ni.
State sawrkar flagship programme – Bana Kaih hnuaiah mahni kutkawiha eizawng leh kuthnathawkte puih tum a ni a, hei hi India ram intodelh ‘Viksit Bharat @ 2047’ hlenchhuah theihnana pawimawh tak a ni tih a sawi. Thlai thar thlan bik pali – sawhthing, hmunphiah, aieng leh hmarcha ah sawrkarin minimum support price a ruahman tih a sawi bawk.
“Ka sawrkar hian kawlphethaa intodelh a ngaipawimawh hle a, kawlphetha indaihlohna sukiang turin hma lak mek zel a ni. Lui luang leh ni zung chakna hmanga kawlphetha siamchhuahna tur project leh power sub-station kan neihsa tihchangtlun hna buaipui mek a ni a. Kawlphetha kan hman dan hi felfai leh mumal zawka kalpui a nih theihnan post paid atangin pre-paid metering-a inthlak turin ruahman siam mek a ni,” Gen (Dr) Vijay Kumar Singh (Retd) hian a ti.
Mizoramah ramngaw kan la nei tha in, tichereu loa siam belh zel zawk turin kan sik leh sa leh leilungin a zo em em tih a sawi a. Hei hi hriain state sawrkar chuan ruahmanna fel tak a duang a, scheme hrang hrang kalpuiin, mipui vantlang tana tangkai tel ramngaw siam turin theihtawpin tan a la mek tih a sawi. Chutihrualin hei hi mi zawng zawng tanrualna tel lo chuan hlawhtling thei a ni loa, thiamna thang zel mila ramngaw leh a chhunga nungcha leh thlai pawimawhna inhrilhhriat a, ramngaw siam belh zel tura inzirtir chu kan tihmakmawh a ni tih a sawi a ni.
2024 October khan, infiamna chi hrang 15 atangin infiammi 410 hnenah Mizoram Sports Incentive Cash Award 2023- 2024, cheng nuai 110.64 hlan a lo ni a. He scheme hi ennawn mek niin, infiamna chi tam zawk, non-Olympic sports thleng pawha huap zo tur leh Team coach-te tana sumfai lawmman (cash prize) tam zawk keng tel thei tura ruahmanna siam tum a ni tih larsap hian a sawi. Mizoram Olympic Vision 2036 thlir chungin sports coaching chu public private partnership hmanga tuaithar tum a ni, tiin, sawrkar hnuaia pawl hrang hrang, team coach-te leh infiammite bakah sports association hrang hrang hruaitute sukthlek pawh heti lam hawi zawnga kaihhruai tum a ni tih a sawi.
Larsap thusawi dang thenkhat:
8 National Education Policy 2020 phut angin, state sawrkar hnuaia university dinna tumin hma lak mek zel a ni a. A ngaihtuahtu tura din, ‘Bill Drafting Committee for Establishment of State University in Mizoram’ chuan an zirchianna sawrkarah an thehlut tawh a. Higher & Technical Education department-in a rang thei ang bera Mizoram State University kan neih theihnan chak takin danpui an ruahman mek.
8 Zirna tihhmasawnna kawnga pawimawh em em chu zirtirtute an ni a. A bikin thingtlang khaw thenkhatah zirtirtu indaihlohna a nasa hle tih a, he harsatna chhawk tur hian kum kalta chhung khan high school zirtirtu 50 (regular) lak a ni a, casual high school zirtirtu 350, casual middle school zirtirtu 342 leh casual primary school zirtirtu 460 lak niin, inrualkhai thei ang berin posting kalpui a ni.
8 Health Clinic 3 chu Health Sub-Centre ah, PHC 7 chu CHC ah hlankai an ni a. Khum 50 leh khum 10 awmna Ayush Hospital, Sub-Divisional Hospital 1, PHC 3 leh Health Sub-Centre 41 sak mek a ni.
8 Mizo hmarchate, aieng leh sawhthing hmanga sumdawnna mumal tak kalpuina atan Mahila Kisan Sashaktikaran Pariyojana hnuaiah Ropuiliani Women Farmer Producer Company Limited chuan Mizoram State Rural Livelihood Mission (MzSRLM) ruahmanpuinain hma a la a. Producer company 5215 inziaklut tawhin, inziaklut an awm belh zel a. Sawhthing leh Mizo hmarchate lakkhawm hna hi kalpui mek niin, GI tag hmanga loneitute chhinchhiah hna pawh kalpui a ni.
8 Mizoramin hriak tam zawk a thar theihnan leh loneituten hlawk zawka an thilthar an hralh theihnan tunah hian Mizorama antam thar pung chho zel leh hriak pai thlai dangte awmze nei zawka sawngbawl theihna turin hriak sawrna khawl (oil expeller) bun mek zel a ni a. Falkawn Aizawl district-ah hriak sawngbawlna hmun (edible oil processing plant) buatsaih mek niin, oil cake mumal taka sawngbawl dan tur thlengin ruahman a ni. Hei bakah hian, alu chi bikah Mizoram chu India hmarchhaka alu chi tha siamchhuahna hmun pui (production centre) ni tura tan la mekin, tunah hian alu chi siamchhuahna hmun (potato seed farm) din thuai tum a ni.
8 Nikumah state thenawmte atangin ar note nuai 5 lalut mah ila, kan mamawh a phuhru zo lo hle a. He harsatna hi sutkian a nih theih beiseiin Zoram Poultry Development Society, tun dinhmuna ar note 20000 vel kartina thar thin kha 80000 vel thar thei turin tihchangtlun belh mek a ni. Hei hi a hlawhtlin hun chuan, tualchhunga ar note mamawhna tal chu phuhru zo tawh tura beisei a ni.
8 Tunhnai maiah Mizoram Electric Vehicle Policy 2024 chu hman theih tura chhawpchhuah a ni a. He policy hian, boruak tibawlhhlawh lo electric vehicle-te uar zawka hman a nih theihna turin ruahmanna a siam a ni.
8 Khawsak harsate tana sawrkar laipui ruahmana in sak sakna, PMAY (G) hnuaiah in 25361 sak tawh niin, sak mek 4605 a awm.
Republic Day vawi 76-na hman a ni State ralmuang tak kan la ni thei zel – Larsap
