Pathianni zan khan Euro 2024 khel tur zawnna neih chhunzawm a ni a, an mikhual Netherlands lakah an tlawm vangin Republic of Ireland an tla. Inkhel dangah Denmark in an group-a hmahruaitu Finland an hneh a, hmahruaitu thar an ni ve thung.
Group B-ah khelh li atanga point thum chauh la hmu Republic of Ireland chuan chak mamawh chungin Netherlands an mikhual a, hma takah goal thun bawk mah se an mualah tlawm zawkah an tang. R. Ireland hian Aviva Stadium-a an mikhual Netherlands lakah bul an tan tha viau a, minute lina lekah penalty an hmu nghal. He penalty hi Adam Idah chuan a pet goal a, hmahruaina goal a thun.
Goal chhuah hma viau mah se Netherlands an insiamtha thuai a, minute 19-naah penalty an hmu a, Liverpool forward Cody Gakpo chuan penalty pet goal in an si phurh a sut. Goal khat ve ve an thun hnu hian chawlhlawk hmain goal dang a luh belh thei lo. Second half minute 56-naah Wout Weghorst chuan Dutch hmahruai letna goal a thun a, 2-1 in hnehna an chang zui ta a ni.
An mualah an tlawm leh tak vangin Republic of Ireland tan Euro 2024 khelh phak ngaihna a awm tawh lo. Khelh nga atanga point thum chiah an la hmuh vangin an beiseina a tham ral zui ta a ni. Hetihlai hian Netherlands erawh chuan khelh li atanga point 9 hmuin, hmahruaitu France an hnaih ve thung. Group B a hmahruaitu France hi vawi nga chak zawn tawhin point 15 an hmu a, Euro 2024 khel turin an tling teuh tawh hle.
Group B lama inkhel dangah Grecee chuan OPAP Arena- an mikhual Gibraltar chu ninga faiin an sawp. Grecee tan hian Konstantinos Mavropanos leh Georgios Masouras ten goal khat ve ve an thun a. Dimitris Pelkas chuan goal khat a thun ve bawk. An mualah an chakna hmangin Greece hian khelh nga atangin point 9 an hmu a, pathumnaah an awm zui zel.
Group H lamah hmahruaitu Finland chu Denmark lakah an tlawm a, pathumnaah an tlahniam. Finland hian hmahruai chhunzawm tura chak mamawh chungin Helsinki Olympic Stadium-ah Denmark an mikhual a. Denmark tan minute 86-naa Pierre-Emile Højbjerg goal thun an sut thei lova, an mualah ngei uiawm taka an tlawm vangin an hmahruaina an hloh.
Group H-a inkhel dangah Slovenia chuan Mimuala an hmachhawn San Marino chu si li faiin an sawp a, table chung berah an inhlangkai. Slovenia tan hian Zan Vipotnik, Jan Mlakar, Sandi Lovric leh Zan Karnicnik ten goal khat theuh an thun a, awlsam takin hnehna an chang.
Group H-ah hian Slovenia leh Denmark ten khelh 6 atangin point 13 ve ve an hmu a, pakhatna leh pahnihna an luah. Pathumna Finland leh palina Kazakhstan ten khelh ruk atangin point 12 ve ve an hmu mek bawk. An group-a pakhatna atanga palina te hi Euro 2024 khel tura tling thei leh tla thei vek an la ni a, Group H hi a ngaihnawm hle. An khelh hnuhnung berin an dinhmun a hril chiang dawn. Team hnih N. Ireland leh San Marino an tla tawh thung.
Republic of Ireland an tla
