Nimina MPCC Spokesperson Dr. Lallianchhuanga’n Sairanga sawhthing dahkhawmna hmunpui a tlawh chungchang, MPCC Media Deptt-in thuchhuah a siamah chuan, MPCC spokesperson hian ZPM sawrkar chhan atan zawhna pahnih a zawt tih tarlan a ni a. Zawhna pakhatnaah chuan, ‘tuna sawhthing kalpui dan buarchuar tak, kuthnathawktute tibeidawngtu hi ZPM sorkar Road Map-ah a tel em? tih leh; pahnihnaah chuan, ‘thlai thlan chhuah lei a nih danah hian campaign laia an sawi uar tak Research Based a tih engmah a awm lo tihna a ni em?’ tihte a ni.
Election campaign lai khan ZPM party chuan ‘research-based’ tih kha uar takin campaign au-hlaah an hmang lah tak a, tun hnua hetia sawrkarna an han siam takah hian, eng emaw felhlel deuh a awmin, a lehlamin ‘research-based?’ an lo auchhuahpui ve vat thin. Sawrkar kal dik lo tur khalh ngil hna thawh hi opposition lamin ‘roll’ an ‘play’ tur a ni ve hrim hrim a. Sawrkar hian development hna thawk tha duh lo ta se, mipuiin kan dem luai luai thin ang; chutiang bawkin, Opposition lam hian sawrkar khalh ngil tumna nei lovin inkuangkuah san mai mai se, kan dem rawn leh luai luai bawk ang; hei hi Democracy sawrkar hlutna tak pawh a ni.
Eng tin maw? “Sawhthing lei khawlsa a tawih nasa; sawhthing tawihte chu hmun engemaw zatah paih khawm a ni. Ruah surin len bo nual tawh mah se, sawhthing |awih an paihna sulhnu hmuh theih a la ni. Road Map awm miah lova sawhthing hi buaipui a ni tih a lang. A hmunah Vai hoin Kg 1-ah Rs 3 leh Rs 5 ten an lei a, mutia ten bag 1-ah Rs 10 hlawhin motor-ah an dah lut thin. Mizoram sorkarin sawhthing a lei khawl hi thar beisei zat atangin zaa 15 (15.71%) vel chauh a ni a, thar chhuah tura beisei zat atangin zaa 84 chuang (84.29%) a lei hman lo tihna a ni a. ZPM sorkar thil kalpui dan fuh loh avangin sawhthing chingtute’n Kg 1 Rs 50 aia sangin sawhthing an hralh theih loh phah a. Sawhthing lei danah ZPM sorkar hian sawhthing chingtute beisei a pha lo nasa hle..” tih a ni a.
“Hmunphiah hi thar chhuah beisei zat atangin zaa 59 chuang (59.49%) lei loh a ni a; Aieng phei chu thar chhuah beisei zat atangin zaa 99 chuang (99.49%) lei loh a ni,” tih a ni bawk.
Thildang chu eng pawh ni se, sawhthing chungchangah ringawt pawh hian, tuna thil thlen dan han en hi chuan, thil reng reng hi a ‘tlachawp’ chet deuh riau hian a ngaih theih a. Sawhthing lei khawl sa “|awih” tih hi tunhma atanga Mizoramin a lo hmelhriat thin tawh kha a ni a. Tun hnuah hi chuan, ‘Research-based era’ kan thleng tawh bawk alawm, tia beiseina sang tak nen mipui kan inkau laia “|awih’ tih bawk hriat tur a awm leh thin hi chu, thil hi kan sawi liam mai mai ve deuh chu a ni lo maw(?) a tih theih awm e.
