Resolution sawihonaah Hmunphiah bawk…

Budget session neih mekah nimin khan house member Jeje Lalpekhlua private resolution – “Ni 100 chhunga tihhlawhtlin tur sorkarin a lo duan lawk, tih hlawhtlin a ni chho zel hi a lawmawm kan ti hle” tih sawihonaah hmunphiahin sawi a hlawh leh hle a. Resolution hi sawiho hnuah adopt ni mah se, opposition member-te chuan an pawmpui lo.
Resolution pu luttu-in a khaikhawmnaah pawh, hmunphiah chungchang rawn react nghalin, “Hmunphiah hi a lo pawimawh hle a ni, kan ramah hian phiahfai tur kan lo la ngah hle a ni ang e” tiin mei nei takin a rawn sawichhuak nghal ve bawk.
Hmunphiah chungchangah hian opposition leader-in Governor’s speech sawichhuakin, ‘he sawrkar hian tun sawrkar kum la la, ni 22 a la awm chhung hian, a bik takin hmunphiah hi kan lei ngei ngei dawn’ tih a sawi, a ti a. “Kuthnathawktuten hmunphiah an ching a, an tap a, an rum a, Governor hian ‘RR associate-in hmunphiah hi lei rawh se’ a ti lo.. ‘ka sawrkarin an lei dawn’ a ti… RR Associate kha sawrkar em ni?… an lei theih loh avanga lei loh ngawt hi a dik dawn em ni?” tiin hmunphiah chungchangah sawrkar a khak a ni.
Hmunphiah chungchangah house leader chuan kum thar atanga empanelled buyer siam a nih tur thu te, empanelled buyer-te nen rate siam a nih tur thu leh, empanelled buyer-te chauh transit pass pek an nih tur thu te, empanelled buyer ni ve lote chuan hmunphiah chu Mizoram pawn an chhuahpui theih dawn loh thu te sawiin, “Chutiang chuan kan control dawn a ni,” a ti.
Hmunphiah buaipui a ni hi a lawmawm hle a. Mipui aiawha roreltute hian thildang pawh vei tlang zel teh se. Ei leh bara kan la intodelh theih loh chhan te hi inhnial nan hmang se, a eng ber hi nge kan la tih dik tawk theih loh tihte hi sawiho se. Agriculture department leh horticulture lamin ei bar tharchhuahna lamah hma an lak tluk tluk laia thenawm state atanga thlai leh buhfai kan mamawh tam zawk kan la chawkluh tluk tluk chhante hi chhui in, tihdik tum se. Buh chin nan ramngaw kan vat a, kan hal kang dur dur a, kum tina FCI atanga kan buhfai lei thin a kiam thei chuang si lote hi eng vang nge tih te hi chhuiin a sutkian dan hi han zawng tak tak teh se.