Mizoram State Resource Mobilisation Committee chu an chairman, chief minister Lalduhoma hoin Inrinni khan an thukhawm a, hmalak dan tur an sawi.
Chief minister chuan sawrkar hmasaah Resource Mobilisation department anga din tumna awm mah se, sum renchem a ngai a, department thar din lam aiin a awmsa pawhkhawm (amalgamate) hial an rilruah a awm zawk a. Committee anga kalpui theih nia a lan avangin an kalpui ta zawk tih a sawi.
Sawrkarin sum hnar tam zawk a neih theih nana hmalakna tur awmte an dap dawn tih sawiin, “Tunah pawh stamp duty lamah bul kan tan a, India rama stamp duty la hniam ber zing ami ni chungin tlema tihsan hlek a ni. Inrenna lam, sawrkar hnathawkte relfelna, disinvestment lam, outsourcing, chhiah hmuh belh theihna leh a tul anga administrative reforms thlengin kan hma chho dawn,” Lalduhoma hian a ti a. An kal chak theih nan sub-committee insiam pawh a that a rin thu a sawi. Rawtna lut tawh leh la lut tur chu thutkhawm lehah agenda-a dah nghal a nih tur thu a sawi a ni.
Resource Mobilisation Committee vice chairman Haukhuma Hauzel leh member secretary Ramchuana ten hma an lak tawh dan an sawi hnuah member-ten hmalak theihna awm nia an ngaih thil an sawiho a ni.
Resource mobilisation lam ngaihtuahtu turte thukhawm
