Restaurant, hotel leh hostel
fai leh thianghlim dan en tum
Aizawl khawpuia restaurant, hotel leh hostel te chu registration fel tak neia din an nih leh nih loh bakah ei leh in an siam kawnga an thianghlim dan enfiah turin Aizawl Municipal Corporation chuan hma a la dawn.
AMC Board of Councillors thukhawm chuan hemi kaihhnawiha hma la tur hian Committee on Regulations of Restaurant, Hotel & Hostel a din a, he Committee member-te sawi danin, an endik tur chu – AMC hnuaiah registration an ti em, an registration a nung (valid) em, dawr neitu in langsar takin signboard-ah license number ziakin emaw an tarchhuak em, eitur siamtu leh hotel/ hostel siamtuten faina leh thianghlimna chungchangah dan angin hma an la em, bawlhhlawh an thliar tha em tih te a ni.
Heng dan zam – regulations hi an zawm that leh that loh enfel a ni dawn tih Committee chairman Rosiamngheta chuan sawiin, November chawlhkar hnihna atangin surprise visit/ checking an nei thin dawn tih a sawi.
He Committee hruaitute sawi danin, tunhnaiah Aizawla restaurant/hotel thenkhatah an ei leh in siam dan a thianghlim tawk lo ni awma sawi a awm thin a; state pawn lam khualzin an tam ve tak tial tial bawk avangin, ei leh in siam dan thianghlim, hmunhma thianghlim leh bawlhhlawh sawngbawl zui dan chu fel taka kalpui a tul a; khawpui enkawltu AMC-in hma an la tih an sawi a ni.
Hemi lam kaihhnawih sawrkar department hmalak mekna nen a insu buai dawn loa, chutihrualin kalkawp tur a ni lo. Hma an laknaa an thil hmuh dan chu a tul anga dan anga bawhzui a ngai a nih chuan a concern department-ah an thlen mai dawn tih an sawi a ni.
AMC Committee on Regulations of Restaurant, Hotel & Hostel chhinchhiah danin, Aizawlah restaurant 819 a awm mek a; hotel leh private hostel 148 ve ve a awm bawk.
Heng hmun hian AMC dan leh hrai neih hi an zawm tha lo a nih chuan sumfaiin Rs.500 atanga 5000 thleng chawitir theih an nih bakah an license cancel sak theih a ni tih an sawi. Registration hi online-a tih theih a ni loa, a form erawh download theih niin, manual-in a dilna hi thehluh a ngai thung. An thil din azirin annual registration fee chawi ngai zat a inang loa, dawr ni lo khawlaia ei tur zuar (vendor) te pawh an in-register vek a ngai tih an sawi a ni.
Restaurant, hotel leh hostel fai leh thianghlim dan en tum
