By Rosangzela, vh
Ph: 8974138026
MPF leh Political Party te hi vawi tam an thawkho tawh a; kum 2008, 2013, 2018 MLA inthlan te, kum 2009, 2014, 2019 MP inthlanah te, kum 2009, 2012, 2015, 2020 VC thlan te, kum 2010, 2015, 2020 AMC inthlante leh kum 2012, 2015, 2020 Local Council inthlanah te thawhho tawh a ni. Heng thawhhona hrang hrangah hian engkim a felfai chuang lo, mahse a chhe lutuk tur a veng a ni. MPF hmalakna hi Political Party, Kohhran leh tlawmngai pawl te remruatna anga kal a ni a, political party lam hian hnawk tih deuh chang an nei thin. MPF huang chhunga thawhhona atanga inhnuhdawk ngam chiah si lovin, zalenna chep ti ru takin an awm niin a lang. Democracy khawvelah hian rorel tura intlansiakna kawng bumboh tak paltlang ngai a awm a, hemi kawngah hian zalenna, dikna, chanvo inzahsak tur a ni. Inthlan boruak hi a hniam tak tak thei lo va, VC atanga MP inthlan thleng hian boruak rit tak a inphum ru vek a ni. MPF hian heng boruak tha lo hrang hrang beng hniam turin ke a pen a, hun khirh tak tawh chang te pawh a nei a ni. MPF hminga che chhuakte hi mihring famkim lo an nih ve tho avangin khawi emaw laiah chuan sawisel tur leh rualkhai lo taka kal chang te pawh a nei ve a ni. Chutih laiin, a pumpuia thlirin MPF kaltlang hian inthlanna boruak muanawm kan nei a ni.
MPF thuthlung hnuaiah Political Party te chu vote lei zawnga hmalak leh hralh tura voters te vehthlem a rem lovin, tih loh tawp tur a ni. Vote hralh chungchang hian ngaihtuahna kawng hrang hrang a siam a, pulpit tlang atanga vote hralh loh tur tih mai hi chu awlsam tak a ni. Vote hralh lo tura miretheite au khum tute hi vote hralh mamawh miah lo an ni tlangpui a, dinhmun tha zawk atanga ke pen an nih chu. Kristian ramah hian rethei leh hausa inkar a zau ta viau mai a, mi tamtak chuan thingtlang rethei te retheihzia leh khawpuia cheng mirethei te nun hahthlakzia an hre phak lo. Political Party te election campaign dan engngemaw chen kan lo hriatpuiin a tak ramah kan lo zir chiang ve tawh a, vote hralh chungchangah thlir dan inbukna a na hle. Thingtlang rethei te dinhmun hniam tak hi Kohhran ai chuan Political Party hian a chiang zawkin engnge tihtur tih hi an man em em a ni. Inthlan dawnah rawn che chhuakin miretheite chaklohna zawnah an rawn dek a, sum rawn hmathehin retheihnain a tuam mek chhungkua ten an lo thlir kar mai a; “kan party candidate hi lo vote ula cheng chutizat kan pe ang che u” tih thu hian a rawn deng dawn tih ka kut dinglam tihtlukin an chiang a ni. Chuvangin he tawngkam hi ni tin kawla ni chhuak chhiara ram lam luhchilh thin te leh thawhtur zawnga khawpuia vak vak thinte tan chuan hnar har tak a ni, an lo Amen a nih pawhin an demawm love.
Pulpit tlang emaw vantlang dawhsan atanga vote hralh lo tura miretheite au khumtute hian retheihna awmzia an fiah lo a ni. MPF badge bela duty ten zan khawthim hnuaiah Party worker che vel umzuiin daikil karah an tlum bo zuk zuk a, mirethei ten kum tam an lo nghahfak Party sum leng vel chu an lo dang chat hmiah hmiah a. MPF hian hna tha tak chu an thawk ngei mai, mahse a phek lehlam kan keu chuan mirethei beidawng hmel leh meialh en lai a lo lang si. Hetianga mirethei zawkte kan umzui ngam ang hian, mihausa dik lo taka Political Party thurualpui thin te hi umzui ngam ve ila tha tur. Mirethei kan ralkhat chhaih a ngam zawng tih vangin vote hralh chhuah chhuahin kan chhuah a, na tak takin kan dem a. Inthlanpui kumah a duh fir ber ang zia zangin sum um loh tur tiin kan au dup dup a, miharsa leh retheite chu vote hralh tiin tawngkam ngaihthlak hrehawm khawpin thu kan chhuah khum a. Chhungkaw khawsak harsat avanga cheng tlemte melh ngawih ngawih tute hi dem mai lovin an harsatna phurhpui ila, an zahawmna humhim a nih theihnan puih an ngai a ni. Chuvangin, Sorkarin miretheite khaichhuahna programme hrang hrang a neih te hi dik taka rethei hnen a thlen theihnan nasa zawkin au chhuahpui ila, inthlan kuma chuk hrep lo hian. Miretheite khaichhuah kawnga ring rawlh chuang si lova, inthlan dawna ngam zawng mirethei zawkte au khum leh chiam thin hi sual a ni. Vote hmanga sum um ngai lo turin kan inkhaichhuah a tulin ram hian a mamawh takzet a ni,
Vote hlutna hi a neitu aiin party worker ten an chiang zawk a, kum tam tak chhunga an thil enghelh ber a nih miau avangin vote neitu vehthlem dan an thiam em em a ni. Khawpui chhunga MLA candidate te hi thingtlang lama in candidate te ai chuan sum seng tlem turah kan ngai tlangpui a, mahse a ni ngawt lo. Khawpui chhungah hian miharsa tak tak, mi in hnuai luaha thawh tur remchang apiang thawk mawp mawp mai an thahnem hle a. Dam mawh hritlanah pawh Private damdawi in pan ngam lo, sorkar damdawi in pan hram hram thin an ni a. Harsatnain a tlakbuak; ni tin sum thawhchhuah dan tur kawng dapa ar bo zawng thin te hian an vote hlu leh zahawm tak an hum zo lo a nih pawhin thiamchanna chin an nei ngei ang. Chhungkaw khawsaknain rahbi a rah tleu meuh chuan; chhungkaw zahawmna humhim hleih theih a ni tawh lova, mahni inthiam lo chungin Party lam tawktarh sum hawpui a tul leh thin. Political Party ten mirethei te sumhmunah sum an chelek hi thil dik lo a nih thu kan hria, hnawksak pawh kan ti. Hnawksak ti hle mah ila, vawiin ni anga mi duham ten kan state sumpai an eiral a, retheihna an peipun chhung hi chuan a bo lovang.
Vote kaltlanga sum dawn leh chelek hi dan chah kan duh, dawhsan rem apiang atangin kan aupui a. A theih chin chinah Pathian thu nen kan hmehbel a, mi tinin mahni vote hlutak leh zahawm tak chu humhim turin kan inchah mawlh mawlh a ni. Vote hralh tih phei chu a than dan a mawi lovin a hralhtu nih pawh a zahthlak, rinawm lo chan te pawh chan theih a ni. Political Party te lei theih nih chu a tlawmthlak kan ti, mahse mamawhnain mi a ur thluk tawh chuan zah a sawi theih tawh lova dan pawisa chunga zawm loh mai awm theih a ni. Ram hmangaihna pawh a dai thei mai awm asin. Kohhran lak runthlakna ramah hian kan Kohhran mite retheihna avanga rinawmna humhim zo lo an awm em? Khawtlang nuna inpawh leh inluhchhuah tak kan nih lai hian kan thenawm khawvengah retheihna avanga hum sual dai mek an awm em? tlawmngai pawl tha tak tak nen a khawsa kan nihna hian retheihna a um bo em? Heng zawhnate hi a taka min chet chhuahtirtu ni se a va duhawm em! Unit hruaitute an rawn kal ang a, in vote kha lo hralh reng reng suh u tia thuchah kan siam thin hi thuchah nung a nih theihnan, sorkar nghak kher lovin retheihna um bo hna i thawk ang u.