Revd Dr Chuauthuama Memorial Committee buatsaihin Thawhtanni khan Aizawlah Revd Dr Chuauthuama piancham denchhenin a nun leh rawngbawlna avanga lawmthu sawina hun hman a ni a. A lehkhabu ziah – “Bawih thahnem Lo: Kum 17+ Sulhnu” tih leh mi hrang hrangin Revd Dr Chuauthuama chungchanga an thuziah lakkhawm – “Lalpa Chhiahhlawh Revd Dr Chuauthuama: Miten Tu Nge A Ni An Tih?” tih lehkhabu chu tlangzarh a ni.
Rev Dr H Vanlalauvan kamkeuna thu a sawi a. Rev Zosangliana Colney-in Revd Dr Chuauthuama chanchin a sawi a; Revd Dr Chuauthuama nun leh rawngbawlna video clip entir a ni bawk.
“Bawih thahnem Lo: Kum 17+ Sulhnu” tih hi Revd Dr Chuauthuama’n Mizoram Synod hnuaia a thawh chhung kum 17 leh a hnulama a inhmanna hrang hrang a ziah a ni a. He lehkhabu hi Rev Dr LH Rawsea’n chuan thlirlawkin Rev Dr FH Liansangzuala’n a tlangzarh. Lehkhabu pakhat zawk “Lalpa Chhiahhlawh Revd Dr Chuauthuama: Miten Tu Nge A Ni An Tih” tih hi Upa R Lallianzuala’n thlirlawkin Rev Prof Tlanghmingthanga’n a tlangzarh.
Inkhawmah hian Revd Dr Chuauthuama thiante pahnih – P Vanluia leh Rev Lalchhuanmawia te bakah mi thahnem takin thu an sawi a. Revd Dr Chuauthuama nupui Lalchhumi’n tawngtaina hun a hmang a ni.
Mizo Pathian thu thiam langsar Revd Dr Chuauthuama hi kumin January 4 khan lung tha lo vangin a thi a ni.
Revd Dr Chuauthuama Pual Hun Hmang
![](https://theaizawlpost.org/wp-content/uploads/Clipboard01-461.jpg)