Hmeichhe World Cup-ah Spain a champion-pui a, champion lawmnaah Spanish Football Federation (RFEF) president chu mawi lo taka chein lawmman semna dawhsanah mi zawng zawng hmuh laiin a kap a tuai a, a hnu lawkah an player pakhat chu a hmuiah a fawhsak a, an buai zui luai luai a, tah chuan an buaina a la tawp mai lo a, Thawhlehni khan RFEF hian an head coach Jorge Vilda an ban leh ta ringawt a, Vilda hian a chunga thuneitute rorel dan chu fair lo a tih thu a sawichhuak.
Spanish FA hian an hmeichhe team boss thar atan Montse Tome an senglut nghal nghe nghe.
Kum 42 mi Vilda lawm lo chuan, “Sporting lam kaihhnawih a nih chuan eng sawiselna pawh ka dawngsawng thei a, mahse, mimal thila min chinleh dan hi chu fair ka ti thei hlawl lo.
“Kum special bik a ni a, engmah hi tlang taka sawiho a awm lo a, keimah nena inkalh zawngin langtlang lo taka sawifel a ni a, an thil sawite kha thudik lo a ni,” a ti siah siah.
August ni 20 final-ah Spain chuan sikhat faia England nulate hnehin, champion lawmna chu an president thak lutukin player remtihna tel loa forward Jenni Hermoso hmuia a fawhsak chuan a hliah zo ta vek a; khami hnu lawk khan Vilda coaching staff zawng zawng tih theih deuh thaw chu an duhthuin an bang a, player 81 zetin Spain tana khelh an duh rih loh thu an puang nghal bawk!
Rubiales ber chuan bang tura nawrna nasa tak karah a ban loh tur thu a sawi a, mahse, Fifa inrawlhin an ‘suspend’ zui ta tho a, Pedro Rocha chu interim president atana ruat nghal a ni.
Kiss scandal thubuai kal zelah Spain player Jenni Hermoso chuan Spanish soccer federation chief Luis Rubiales lakah Nilaini khan thubuai (criminal complaint) a thehlut fel tawh a, a hmuia fawh kha a remtihna tel lo a nih thu a complaint thehluhah hian a tarlang.
Rubiales hian Spain rama an top sport court-ah thubuai rit tak (criminal charges) a awrh chho dawn niin a lang a, Fifa lamin a khawsak dan an chhui mek bawk a, chutih chhung atan ni 90 a office luah thei lo turina ‘suspend’ a ni mek bawk.
Spain rama football buaina hian kawng hrang hrangin kua a hreuh belh zel a, tunlai hian Spain rama an top-tier women footballer-te chuan hlawh san phutin nawrh an huaihawt leh mek.
Hmeichhe division sang ber Liga F an tih season thar chu nimin, Zirtawpni khan tan tur a nih laiin player-te an nawrh tak avangin season thara game hmasa pahnih chu an khel duh ta lo phawt a ni.
Spanish Players’ Association (AFE) thuchhuah chuan an beisei ang hlawh an hmuh loh avanga nawrh huaihawt an nih thu an puang.
Hlawh chungchanga inbiakna hi kum khat kalta atanga tan tawh niin, professional-a Liga F an leh hlim atanga hlawh chungchanga buai nghal an ni a; season liamta khan an inbiakna engah hlawh tlem ber (minimum salary) chu euro 16,000 (£13,700) ni turin rem an ruat chhin a, mahse, player-te lam hian 2023-24 campaign atan hlawh hniam ber hi euro 25,000 ni turin an nawr a; season tharah chuan euro 30,000 lama kai chho leh turin an nawr nghal bawk.
Hetih lai hian Liga F lam chuan player-te hnenah minimum salary atan euro 18,000 ni se an ti a, season thar pathum lo herchhuak leh turah hian euro 25,000-a kai chho turin an ti bawk a, mahse, he rawtna hi player-te’n an pawm lo a, nawrh an huaihawt zui ta tho a ni.
RFEF chungah Vilda lawm lo
