RG Stadium leh a chhehvel
Sports department kutah lut
Mualpuia Rajiv Gandhi Stadium leh a chhehvel ram chu Home department kut atangin Sports & Youth Services department kuta hlan a ni.
Ningania a hlanna inkhawmah Home secretary Vanlalmawia leh Sports & YS secretary V Lalsangliana ten hming an ziahhnan hnuah Home minister K Sapdanga’n SYS minister Lalnghinglova Hmar hnenah a hlan.
RG Stadium dinna leh a chhehvel ram hi landlease no.23 of 1992 chhung ami a ni a. Home department ram niin, 3rd Bn MAP hmun a ni. Kum 2010 khan khelmual siam hna hi tanin, Mizorama khelmual tha leh changtlung ber a ni a; a hmunhma enkawl hi SYS department kutah awm mah se, a ram hi Home department ta ala ni zui zel a ni.
SYS kutah neitu nihna hi hlan a ni ta a. Rajiv Gandhi Stadium awmna leh a chhehvel ram hmun thenkhat, Home secretary hminga awm mek chu Sports & Youth Services department hmingin dah a ni tawh ang.
Home minister chuan Mizoram Police hmun pawimawh leh ui em em chu thalaite tan leh sports hmasawn zelna atan SYS department kutah an hlan tih a sawi a. Neitu nihna thinlung nen tangkai lehzuala an hman a beisei tih a sawi.
“Ka thawhpuite nen vawi engemawzat kan sawiho hnuah kan ram hlu tak chu ram tana tangkai tur zawka kan rin avangin Sports department kutah kan hlan ta a ni,” a ti.
Sports minister pawhin sports-ah sum leh hun an seng hnem chungin, ram pum huap intihsiaknaah kan la hniam hle tih a sawi a. Tunah chuan sawrkarin sports kalpui duh dan mumal tak a neih avangin Rajiv Gandhi Stadium leh a chhehvel hmunhma hi sports hmunpuia siam a, training-na hmunhma leh Centre of Excellence-a siam tumin ruahmanna an nei a, Home department-in phal taka an kuta an hlan chu an lawm takzet tih a sawi a ni.
RG Stadium leh a chhehvel Sports department kutah lut
