Rihanna leh Drake hla hot zet mai “What’s My Name?’ music video chuan YouTube-ah vawi tluklehdingawn en a hlawh ta. He music video hi 2010-a an tihchhuah kha niin, a kum 13-naah he mellung hi a kai ve ta a ni.
He video-ah hian a hunlaia inkawp ni a thuthang Rihanna leh Drake te hi dawr chhungah te, New York apartment chhungah te an inkuah meh ve hle a, wine in dunin, an inkai a, lukhama invuak te pawh an tih ve kha.
RiRi leh Drake thawh dunna hla hi an vanglaiin Billboard Hot 100 (singles) chart-ah No.1 a kai a, Digital Songs-ah pawh No.1 a kai. He hlaa an thawh dun hnuah 2016 khan ‘Too Good’ tih hla leh ‘Work’ hlaah te pawh an thawk dun leh a, 2011 khan ‘Take Care’ hlaah an lo thawk dun tawh bawk.
‘What’s My Name?’ hi 2010-a Rihanna album ‘Loud’-ah khan telin, a album hi Recording Industry Association of America certified 3x platinum (US-a maktaduai 3 hralh theih tihna) a kai nghe nghe a ni.
Rihanna & Drake ‘What’s My Name?’ 1B view club-ah
