Ni êng hi Vitamin D kan hmuh theihna tha leh pawimawh tak a ni tih kan hria. Vitamin D chuan ruh a tichak a, kan immunity a tichak thei bawk tih te hi chu kan hre fo tawh ang, mahse, kan la hriat ngai loh pakhat chu- intihcher tumte tan Vitamin D a pawimawh tih hi a ni.
Vitamin D hian kan taksain calcium leh phosphorus a hip zung zung theih nan a tanpui a, chu chu ruh tihchak nan a pawimawh a, immune system a tanpui bawk, chutihrual chuan rihna tihniam nan pawh a tangkai niin Times of India health section chuan a tarlang.
Mithenkhat in-diet a, exercise la tha bawk, mahse, duh anga rihna paih chak hleithei lo an awm thin. Hetiang hi i lo ni ve a nih chuan i vitamin D level check chhin teh. Mithiam ten zirchianna an neih atanga an hmuh danin vitamin D tlakchham hian rihna a pung duh a, mi a tithau duh tih an hmuchhuak.
Ni êng hi vitamin D kan hmuh theihna awlsam leh tha ber pawl ni mah se, khawvel mihring 50% vel zet hian kan taksa mamawh khawp vitamin D kan nei lo an ti tlat! Thau uchuak (obesity) leh Vitamin D inkaihhnawih dan hi hrechiang tur chuan zirchian lehzual ngai a la ni a, chuti chung chuan mi thau lutuk leh rit lutuk te hian vitamin D an tlachham deuh zel mai a, Brazilian scientist ten zirchianna an neih atanga an hmuh danin mi thau uchuak (obese) 35% te chuan vitamin D an tlachham niin an sawi.
Ethiopian naupang zinga zirchianna an neihah pawh Ni êng dawng tha lo vitamin D tlachham te chu an body fat mass-ah nghawng a nei tih an hmuchhuak bawk a, hei hian vitamin D tlakchhamna hian taksa rih danah nghawng a nei tih a tichiang niin an ngai.
Vitamin D kan lakluh tam theih nan Ni êng hi a pawimawh a, ni lum ai tam deuh la, zing dar 8 rik hmain ni êng hnuaiah walk la, i walk-in i taksa khuh vek lo la. Zing dar 8 hnu lamah chuan sunscreen hman a tul tawh.
Kan chaw eiah pawh Vitamin D pai tam chi ei tam a tha, bawnghnute, nghapui thau, salmon, almond, yogurt (dhoi), artui, tuna leh pâ te hian vitamin D an pai tam.
Zingkar walk vel i ti thei lo a nih chuan doctor rawn chungin vitamin D supplement te pawh ei tur a awm e.
Rihna tihniam duh tan vitamin D a pawimawh
