Rinhlui leh Sawma ropuina MBA official championhip
July ni 22 atanga ni 25, 2025 chhunga Mizoram Badminton Centre, Zuangtuia khelh zawh tak Yonex-Sunrise PC Gabriel Lalliansanga Memorial MBA Senior Official Championship 2025-ah women’s singles champion lai H. Lalrinhlui’n a lallukhum a humhim a; men’s singles-ah Vanlalmalsawmzuala a chak ber ve thung.
Mizorama badminton tournament lian leh kum khat chhunga badminton inelna ngaihhlut hlawh ber hi Saron Badminton Club leh Mizoram Badminton Association tangkawpin an buatsaih a ni.
Ngaihven hlawh tournament chu…
MBA official championship hi chi hniha then niin, senior leh junior category-ahte a hrangin inelna kalpui a ni a; Badminton Association of India (BAI) pawmpui inelna niin, Mizoram chhunga player tha pawh an inlan kim hle.
Senior official championship khel turin India ram hmun hrang hranga coaching kal mekte pawh an rawn haw khawm a; inelna boruak sang tak leh nung tak neih niin, MBA YouTube channel-ah live-a pekchhuah a ni.
Men’s singles-ah champion thar
Ngaihven hlawh ber inelna men’s singles final-ah Vanlalmalsawmzuala s/o Lalkhawpuia (L), Serchhip Vengchung leh Malsawmhlua s/o Albert Lalnunhlima, P&E Veng, Serchhip an intum a, an pahnih hian New Serchhip Badminton Club tana khel ve ve an ni.
Final lutte hi under-19 player ve ve niin, senior category-a vawi khat final an luhna ve ve a ni bawk.
Sawma hian semi-final pakhat zawkah tournament-a seeded no 1 leh champion lai Saitluangpuia Sailo a hneh a; Malsawmhlua (Mama) pawhin semi-final lehlamah junior player tha leh hming chher mek Sainunmawia Sailo a hneh ve bawk. Final thleng tur hian tun dinhmun a Mizoram player tha ber berte an hneh a ni.
Final inkhel hmuhnawm takah Mama a chungnung hmasa zawk a, 23-21-in first game a la.
Second game-a Sawma rawn insiamtha chuan 21-17-in game a rawn la let ve leh a; deciding game hmuhnawm takah Sawma’n tharum a ngah zawkna leh thluak fim zawk a neih rawn hmangtangkai in, 21-14-in a chak leh a, MBA Senior Official Championship men’s singles category-a champion thei mi tlemte zingah a hming ziahluh thar a ni.
Hmeichhe lamah Rinhlui bawk…
Nikum lamah MBA Senior Official Championship-a champion thei naupang ber nihna record a lo siam tawh a, kuminah pawh Chanmari West tleirawl H. Lalrinhlui d/o H. Zohmangaiha chuan a champion no mawi a humhim a, kum 16 leh thla hnih mi chiah a la ni.
Tuna Chanmari Shuttlers Club tana khel mek Rinhlui tan kumin tournament hi chhinchhiahtlak a, category pathumah final lutin, pahnihah a champion!
Final-a Rinhlui tumpui Tirza Lalremruati d/o Lalhmachhuana, Kolasib Hmar Veng, Sihphir Badminton Club tana khel mek khan kum 13, thla 6 leh ni 12 mi chiah niin final a lut a, Mizoram Badminton Associationin senior category-a tournament a siam tawhah final thleng thei naupang ber record a rawn siam ve bawk a ni.
Semi-final pakhat zawkah Rinhluii hian seeded no 2, Laldingpuii a hneh a; lehlamah Tirza-i’n National Centre of Excellence, Guwahati-a awm mek Lalrempuii a hneh ve bawk; a first match ah seeded no 1 Lalrinhlui a vaw thla nghe nghe.
Final inkhelah Rinhlui’n experience nei zawk a nih lantirin, 21-8, 21-11-in, awlsam angreng takin hnehna a chang a, a lallukhum a humhim.
Tarlan tak angin, Rinhlui hian women’s singles bakah women’s doubles leh mixed doubles-ahte final a lut tel a; women’s doubles-ah Lalrempuii, New Serchhip BC nen inkaw in, final-ah Ramngaihzuali leh Zoramthari (SPBC)-te tangdun chu 21-17, 21-16-in an hneh a, an champion bawk.
Double champion Sainunmawia
Tun tournament-a hming langsar ber zinga mi chu Sainunmawia Sailo s/o Saizama Sailo a ni.
Ramhlun Venglaia cheng niin, Sihphir Badminton Club tan a khel a, tun tournament-ah hian category pahnihah final lutin, a champion ve ve.
Men’s doubles-ah Mawia hi a u Saitluangpuia Sailo nen an tangdun a, champion lai leh seeded no 1 ni bawk, Joseph VL Ringngheta leh C. Lalramzauvate inkawp nen final hmuhnawm bik leh mit titlai tak an khel.
First game-ah Mawiate unau hi 21-13-in, awlsam angreng takin an chak a; second game-ah Jojo-a leh Ramzauvate insiamthain, 22-20-in an rawn chak ve leh thung.
Hemi hnu hian deciding game hmuhnawm leh chhinchhiahtlak tak an khel a; an duce zak zak hnuah 24-22-in Mawia leh Tluangpuiate unau chu chungnung zawkah an tang a, MBA-in men’s doubles champion thar a nei ta a ni.
Mixed doubles final-ah Sainunmawia Sailo leh Zoramthari (SPBC)-te thawkdun chuan Vanlalhruaia Sailo (Chaltlang BC) leh H. Lalrinhlui (CSC)-te inkawp chu 21-19, 21-13-in an hneh leh bawk.
Mawia partner Thartei hian tun tournament-ah hian category pahnihah final a lut ve bawk.
Chhinchhiahtlak inelna
Tun tum MBA Senior Official Championship-ah hian men’s doubles category tih loh category dang zawng zawnga final lutte hi junior category player-te vek an ni a, final lut thei naupang ber record thar siam a ni bawk.
He’ng player naupang tak takte hi PGBA, ITM University leh NCE, Guwahati-a training nei mekte an ni a, chu’ng karah chuan men’s singles category-ah junior category player tho, Serchhip lama a uin coaching a pek mek a rawn champion nawlh bawk a ni.
He tournament hi PC Lallawmsanga, IPS (Rtd.)-te chhungkuain nikum lama hun lo taka boral ta, a fapa PC Gabriel Lalliansanga hriatrengna’na an sponsor a ni.
Tunkar chho hian NEXA MBA Junior Official Championship 2025 khelh chhunzawm tur a ni a, hei hi MSSC Golden Jubilee lawmna tournament tur a ni dawn a, MBA Official YouTube channel lamah live-a pekchhuah leh thin tura ruahman a ni.
RESULT KIMCHANG
Men’s singles:
Champion: Vanlalmalsawmzuala, NSBC
Runners-up: Malsawmhlua, NSBC
Women’s singles:
Champion: H. Lalrinhlui, CSC
Runners-up: Tirza Lalremruati, SPBC
Men’s doubles:
Champion: Saitluangpuia Sailo & Sainunmawia Sailo, SPBC
Runners-up: Joseph VL Ringngheta & C. Lalramzauva, MBC
Women’s doubles:
Champion: H. Lalrinhlui, CSC & Lalrempuii, NSBC
Runners-up: Zoramthari & Ramngaihzuali, SPBC
Mixed doubles:
Champion: Sainunmawia Sailo & Zoramthari, SPBC
Runners-up: Vanlalhruaia Sailo, CTBC
& H. Lalrinhlui, CSC