State Level Committee on Standardisation chu a vawikhatna atan an chairman, chief secretary Dr Renu Sharma hoin Thawhlehni khan Aizawlah an thukhawm.
Chief secretary chuan chu mipuiin kawng hrang hranga service an dawnah a tha leh rintlak, an tana him an dawn theihna, quality control atana Bureau of Indian Standards (BIS) inkaihruaina leh zawm tura a duan chu mipuiin zawm a pawimawh rualin, state sawrkar pawhin a ngaihpawimawh a ngai a, product tha leh rintlak bakah mipui himna ngaihtuah a tul a, sawrkar hnuaia bungrua leh hmanraw supply pawh a theih chin chinah BIS inkaihruaina zawm a tul, tiin a sawi.
Thutkhawmah hian Mizoram sawrkarin kum 2020-a a din Standardisation Cell chu India ramah a din hmasa pawl an ni tih BIS hotute chuan an sawi a. Chak lehzuala he Cell hian hma a lak chhunzawm theih dan tur sawi ho a ni.
State sawrkar official-ten standards mumal taka ruahman bakah mumal taka kalpui, a tangkaina enzui leh mipuiin an chhawr tangkai theihna’na hma an lak dan tur sawi a ni a; tui connection neiten BIS quality mil tui thianghlim in tur an dawn ziah dan turte, ISI (Indian Standards) chhinchhiahna tel lo tui in tur zawrhchhuah a nih lohna’n te, ISI chhinchhiahna tel helmet chauh hralhchhuah a nih theihna’ntea hmalakna dan tur sawiho niin, sawrkarin hma a lo lak tawh dante sawi a ni bawk.
Rangkachak, tlereuh leh thil hlu dangte a dik leh dik loh chhinchhiah (hallmarking of gold jewellery and artifacts) chungchang, BIS management System Certification Scheme kalpui dan tur, mipui hriatthiam tura India Standards inzirtirna kalpui dan, sawrkar laipuiin Quality Control Order tihchhuah a taka kalpuite sawihoin, zirna ina Student Clubs on Quality and Safety din pawh sawi a ni.
BIS hotute chuan ‘BIS CARE’ mobile application an siam chu playstore atanga download theih a ni a, he app hmang hian kan thil lei – rangkachak, helmet, tui bottle, mobile phone adt India Standards mil a nih leh nih loh a endik theih tih an sawi a ni.
Thutkhawm zawh hian Legal Metrology controller Dr Andrew H Vanlaldika hoin Legal Metrology leh BIS hotute inhmukhawmin, an sawiho zingah in sakna bungrua leh hmanrua chi hrang hrang him leh him loh leh a tul anga endik dan tur sawihoin, iron rod pawh BIS bituk aia te Mizoramah a lut nasa nia hriat a nih thu an sawi a, hei hi Legal Metrology controller hoin an endik nghal a, a tul angin sawrkarin thupek a tichhuak zui dawn a ni.